Die historie vanden vromen ridder parijs ende van die schone vienna des dolphijns dochtere

¶ Hoe dat paris viennen toesprac doer een venstere

PAris dede so vele dat hy vienne geraecte te spreken doer een neder venster Daer seide hem vienne. Ic ben des sekers dat myn vadere wille heeft v arch te doene. dies ic in grooten drucke ben. want ick ter werelt negheen dinck bouen v beminne. waert dat ghi bi misualle quamt te steruene. ick en begherde niet langher te leuene Doen sprack parijs. Eerwerdighe vrouwe my dunct gheraden dat ick een wijle van hier trecke. tot dat myn heer uwe vadere synen grammen moet vergheten heeft Tis mij een druckelijck dinc van v te scheiden. want myn leuen sal des te droeuer wesen Niet te min ic sal nochtans v te wille wesen in alle tgene dat ghi mi beuelen sult. my comer af dat mach Aensiende vienne dat goede herte van parijs. seide sy hem na meer woerden Myn lieue vrient paris ic bekenne wel die groote liefde die ghij te my waert draecht. Ende in dien het al soe is so sweere ick v by mijnder trouwen dat ghi sonder mij nemmermeer van deser stadt trecken en selt want het is soe mynen wille. waerom bereydt v ende versiet v van allen dinghen dye wij behoeuen mochten so ghi ierst moecht. Ende vint maniere dat we wt dit conincrijck gheraken moghen Nochtans aleer wi van hier scheiden wil ic dat ghij mi gheloeft twee dingen. Deerste is. dat ghi minen persoen niet en sult ghenaken voer dat wi wettelic ghetrout sijn Dat ander is, dat ysabeele met ons deyle ende gheniete alle ons goets dat wi hebben Anders soe en beghere ic niet. dan dat onse reyse corttelinge ghebure. ende ick sal ons versien van sommighe iuweelkens: ende van ghelde voer ons behoefte. Ende dit so gheloefde haer paris aldus. ende mettien schieden sy van malckanderen.

ALs paris van viennen ghesceiden was ghinc hi tot eenen man geheeten iorijs ende seide. mijn liene vrient iorijs Ic hebbe altijt myn betrouwen op v gheset ghehadt. waer omme ick v nv bidde dat ghi mi niet faillieren en wilt in tghene des ic v segghen sal, want ghi en sulter niet aen verliesen. iorijs geloefde hem te doen al dat hi vermochte van goeder herten. doen seide paris. weet dat ick haet ende nijt draghe op eenen binnen deser stadt om ongenuechte die hy my aene doet. waerom dat icken doot slaen wille. ende alsoe gheringhe als icken doot sal hebben. soe wil ick trecken vten gehelen conincrijc van vrancrijc Ende dairom biddic v dat ghij wilt gaen in agemoirte opt zee. ende dat ghi dair leent ende toemaect

[fol. c5r]

een galeye die al ghereet bliue ligghende van allen dinghen tot dat ick al dair aen come. ende bidde v voirt dat ghi besorcht dat van hier in agemoirte van v. mijlen te vijf mijlen ghereescap van peerden sy. ende dat dit gheschie so heymelicken alst emmermeer mach. ende hout daer daer is ghelt om dat mede te volbrenghen Iorijs seide dat hijt gherne doen soude. ende als hi in agemoirte quam huerde hi terstont een galeye ende bestelde al omme die passagien ghelijc hem paris belast hadde. ende als doen quam hi wederom tot viennen, ende seide parise hoe dat hijt al beschict hadde. Ende parijs bat hem dat hi voert met hem gaen woude hi soudet hem wel loonen Ende daer na ghinc parijs viennen segghen hoe alle dinc bereet was ghelijc sy beuolen hadde. ende dat sy daerom haer bereet maken woude teghens den toecomenden nacht. ende zoe sloten sij datse beyde gader als dan gereet wesen souden inden voernacht ten eersten slape. Ende doen beual parijs iorijse dat hi inden stal gaen soude ende nemen al daer twee peerden, ende sadelen die buyten der stadt ende dat hijen aldaer op een seker plaetse verbeyden soude tot dat hi ghecomen ware Ende hier en wist eduwaert sijn geselle niets niet af