Die historie vanden vromen ridder parijs ende van die schone vienna des dolphijns dochtere

¶ Hoe dat heer iacob aen den dolfijn te huwelic versochte sijn dochtere voer parijse synen sone.

[fol. c4r]

DOen ghinck nae desen heer iacob totten dolfijn met ongeverweden aensichte. ende seyde aldus Mijn alre gheduchtingste heere mij es een bede ghelast om v te segghene, die mi dunct van cleynre achtinghen. ende daerom biddick v dat ghij myn dwaesheyt vergeuen wilt op dat het v tonpasse sy Die dolfijn hem betrouwende inde wijsheit ende verstandelheyt van heer iacob. gaf hem oerlof te segghen dat hem gheliefde. Doen sprack heer iacob aldus Mijn lieue hoghe ende gheduchtighe heere, parijs mijn sone die heeft mij gebeden v te segghen dat hi viennen uwe dochter hebben mochte te wiue. welcke dingen niet alleen te segghen maer oeck te peynsen is een grote ende dwase verwaentheit. maer die liefde van mijnen sone bedwingt my so hertelic dat ickt v emmers segghen moet Ende mettien ontstac de dolfijn van toerne also seere dat hi heer iacob niet horen en mochte volspreken. maer hi straften ende seide hem aldus Du snoode vassael die ghi syt. bewairt ghi aldus mijn eer Ick salder v so af castijen dat ghi dies ghelijcke nemmermeer dencken en sult ende beual hem dat hij hem terstont van daer maken soude. ende dat hi noch sijn sone nemmermeer en quamen voer zyn ooghen. Ende soe schiet heer iacob al beschaemt van daer weder tsynen huse waert. ende vertelde parijse sijnen sone alle dat ghene des tusschen den dolfijn ende hem gheschiet ende ghedaen was. Van den welcken dat parijs synen vadere grooten loon bat ende menichfuldelijck dancte

DIe dolfijn ghinc al peynsende wandelende in sijn palays met ghestoorden moede. zoe seere dat niemant hem toe comen oft toespreken en dorste. ende dede mettyen voer hem comen sijn dochter vienne, ende seide haer. wi hebben seer onghenuechlijcke woorden ghehadt Die vileyn heer iacob heeft ons gheseit dat wi v souden willen gheuen te wyue synen sone parijs Besiet wat wysheyden. ick soude bij onsen here v lieuer nonne maken. Ende ten sal niet langhe ghelijden ghi en sult so hoechlicken ghehilijct zyn dat ghijs wel te vreden wesen sult. Ende ick swere v dat, en daden die grote diensten die hi my ghedaen heeft ic dede hem syn hoot af houwen. Ende als vienne haren vadere soe seer verstoirt sach op heer iacob ende synen sone. soe seynde sij om eduwaerde dat hi haer quam toe spreken. ende als hi ghecomen was doe seyde hem vienne hoe dat haer vader seer verstoert ware op heer iacob ende parise des si te mael seer rouwich was seggende voert, dat sy hair grote sorge hadde voer parise dat haer vader hem arch doen mochte. ende daerom sprac sy willet hem segghen, op dat hi hem verborgen houden mach ic sal besien oft wi synen toirne niet ghesaten en mochten Mettien so nam eduwaert oerlof ende ghinck parise dit aldus segghen. Voert soe seyde hy hem my soude goed gheraden duncken dat

[fol. c4v]

ghi een wijle van hier vertroct buten desen lande. want bi auentueren die dolfyn en sal sinen toren niet lichteliken vergeten na dat mi vienne gheseit heeft Parijs antwoerde na dien dat v geraden dunct so sal ict doen. niet teghenstaende dien dat my tverscheiden druckelic weseu sal maer al eer dat ick noch van hier scheide so willick oerlof nemen aen die schone vienne al soudicker om moeten steruen.