Die historie vanden vromen ridder parijs ende van die schone vienna des dolphijns dochtere

¶ Hoe parijs ende eduwaert weder keerden van brabant

ALs parijs aldus een lange tijt met eduwaert synen gheselle in brabant gheweest hadde so verlanggede hem seer na die scone vienne te siene want die minne van haer bedwanc hem seere, hoe wel dat hi dat eduwaerde niet en dorste segghen om deswil oft hi by auentueren niet en soude willen mede vertrecken. Ouer vijf daghen hier nae quamen paryse brieuen hoe dat syn vadere seer sieck was. die ouerlesen hebbende sprac hi tot eduwaerdt. mijn lieue geselle myn vader legget seer sieck. mi dunct op dat ghyt mede consenteert dat wi daerwerts willen. ende alsoe biddijck v dattet v niet en vernoeye want wi op dat god wilt ter stont wederkeeren selen. ende also schieden sy van daer ende quamen te viennen. van welcker coemste heere iacob seere blijde was. ende alremeest want hi ghehoort hadde dat paris seer groote vrome fayten van wapenen ghedaen hadde Nu ghebuerdet doen parijs thuys ghecomen was ende dat hi soude gaen slapen dat hi ghinc in syn oratorie doende syn ghebet. ende dat ghedaen synde ghinck hi onder syn dinghen besien of hem daer niets en gebrack. ende beuant dat hem ghebrac tghene dat hy alder liefste hadde dies hi seer ongestelt was ia dat hi van alle den nacht niet geslapen en conste Ende tsmergens seide hy tot synder moeder. hoe datse qualicken

[fol. c1r]

ende niet wel sijn camer ghesloten hadde ghehouden. want hij daer sommighe dinghen ghemiste. die hy om geen eertsche dinck en woude verloren hebben. Bij mynre trouwen soen sprac sijn moeder daer en heeft noyt yemandt inne gheweest dan op een tijt doen v vader siec lach. diane ende vienne haer dochtere. Doen sij uwen vader besocht hadden, clommen sij opwaert om tcasteel te besiene. ende doen ghinghen sy in uwer cameren. maer ic en kan niet ghepeisen dat sy v yets ghenomen souden hebben. want sy daer niet en toefden dan vienne met ysabeelen harer ioncfronwen . die daer wat bleef omme dat haer aen therte qualic gheworden was. waeromme sone ick bidde v dat ghijer gheen ongenuechte in maken en wilt Dit hoorende paris seide hi in hem seluen. eest sake dattet bi genen dieue gedaen en is te min leyter ane want bi dien en salt niet geopenbaert werden Ick en weet oft vienne yet ghedaen mocht hebben yewers omme. Voert na desen ginck hij hem cleeden ende abyllieren so hi houelicste mochte. ende ghinck soe ten dolfijn weert omme hem dyane ende vienne te doen die behoirlike reuerencie. Die dolfyn ontfinck hem seer blijdelijcken ende vraechde hem nae niemaren ende van anderen dinghen Ende als vienne parijse sach wart sy ghedaen root ghelijck eender roosen. van grooter begheerten die sij hadde om hem te siene. ende doer dye liefde die sij te hemwaerts droech. ende si en conste niet versaden van haren lieuen paris te aenschouwen. ende hoe sij hem meer aensach. hoe haer die liefde meer wies. Parijs was voer den dolphijn op sijn knyen oetmoedelijcken. ende en dorste viennen niet eens aensien dwelck dat hem int herte pijn dede. ende dien wel gekent hadde. soudt wel ane sijn aensicht ghesien hebben. doen dye dolphijn hem ghevraecht hadde tghene dat hem beliefde. soe nam parijs aen hem oerlof ende aen dyanen ende vienne hair dochter. ende keerde weder tot sijns vaders waert

Binnen cortten daghen na desen seyde vienne tot ysabeelen haerer ioncfrouwen als die ghene die mit allen seer met liefden beuangen was. Mijn suster mi dunct dat paris gaet al peysende. ic meyn dattet is om sijn dingen wille die hi niet en vint in sijn oratorie. ic soude raden voir dbeste der wi hen daden weten dat wise hebben. dat wair wel gedaen sprac isabele mer dattet emmers eerbaerliken ende heimeliken gedaen werde. Doen seide vienne. ic sal een manier daer op ramen. Op een pas dairna seide vienne tharer moeder hoe si haer een luttel gevuelde van consciencien ghelast. waerom si haer begeerde te biechten tegens enigen goeden persoen. ende seide voert hoe sij gehoirt hadde dat die bisscop van sinte laureys een eerbaer ende deuoet man was ende badt daerom harer moeder dat sijen ontbieden woude om hem te mogen spreken. ende eensgancs dede diane den bisscop halen. vienne biechte haer seer deuotelic sprekende altijt van gode ende syn geboden ende gebiecht sijnde so bat sij hem hertelicken dat hij

[fol. c1v]

tsanderdaechs weder tot haer comen woude. want haer syn goede woerden seer vertroost hadden. ende als dan soe moest sy hem noch eenighe dinghen te kennen gheuen int heymelicken Des anderen daechs daer na quam die bisschop weder tot viennen. ende vienne seide hem aldus Mijn gheestelick vader het syn eenige stucken genomen geweest op een plaetse die welcke toebehoren parijse heer iacobs sone Ende die persoen diese heeft maecter consciencie af. waer omme ick bidde v dat ghi hem wt uwer goedertierenheyt segghen wilt. bij alsoe dattet syn mach dat hi merghen met v tot hier come. Die bisschop die nenen verstont wat viennens meyninge was seyde dat hijt sonder twiuel doen soude