Die historie vanden vromen ridder parijs ende van die schone vienna des dolphijns dochtere

¶ Hoe dat dyane ende vienne ghinghen besuecken parijs vader die sieck gheworden was

[fol. b5v]

HEt gheboerde die wijle dat parijs ende eduwaert in brabant waren dat parijs vader in een sieckte viel vander cortse dat hem doer die onghenoechte van synen sone toecomende was. die wijle dat hi so lach ginck hem die dolfijn besuecken ende troosten so hi best mochte. ende hiet syn vrouwen dat sijen oec besuecken ghingen Ende so ginck diane ende vienne haer dochter met ysabeelen ende meer anders geselscaps daerwerts heer iacob paris vader besueckende. ende bi hem comende vraechde dyane hem na die toecomste van synder siecten Heer iacob antwoerde hair dat hem sijn siecte toequam van parijs sijns soens weghen den welcken hi een wijle met groter bliscap aengesien hadde. maer nv ginc hi daghelijcx metten bisschop van sinte laureys. ende ic beduchte dat hijen in een clooster trecken mochte. ende ick en hebbe niet meer kinder dan hem wat sal ick dan maken metten goede dat mi god onse here verleent heeft Myn vrouwe dyane die troosteden so si best conste ende seide hem. hoe syn sone vanden dolphijn zeere bemint was ende van vele groter heeren. ende dat hem noch goet gebueren soude Ende met dien sprac dyane voert van dingen tsijnre gesontheit hem dienende Daer nae bat paris moedere diane datse tcasteel met haer wilde gaen besien Ende in dat doende so leydde sij haer ten eersten in een zale al vol haernasch ende ghewere Daer na leydde syse in een ander sale daer in dat stonden valcken sperweren ende dier gelyc voghelen dienende ter iachte, ende daer na leydde syse in veel meer andere salen ende cameren zeer rijckelic toegemaect dat te vele ware te vertellen Ende nae dien wees sy haer paris camer daer hi inne sliep ende daer hi sijn ghewaden inne hadde die genoech waren geweest voer eenen prince. ende in dier cameren stonden twee cofferen ouerdect na die vransce maniere Deen was vol gulden stucken syden ghewaden ende dies ghelijcken Mettien sprac vienne tot ysabeelen. bi mynder trouwen suster ten geeft my gheen wonder dat van desen iongen riddere soe vele mencien ghemaect es gheweest. want die ordinancie van synen dinghen bewijst wel dat hi van groter weerden is. Ende dit aldus ouersiende versach vienne al daer een witte couuertorie van eenen paerde ende haer dochte dattet die selue was daer parijs den ternoy mede ghewan in de stadt van vienne Daer op ysabeele antwoerdende vraechde oft sy meynde datmen elderswaer van gheliken niet en vonde. segghende dat haer dat liegen mochte Vienne die besach die noch bat ende sprac aldus tot harer moeder Mijn lieue moeder mi coemt een wedomme ouer. waerom op dat v geliefde ick in dese camer gerne wat rusten soude. ende laet my alleenlic met mijn suster ysabeele. ende metten gange ghingen sy alle gader wt, ende ysabeele greyndelde van achter die dore. Doen sprack vienne. nv selen wij sien oft wi negheen souden moghen gheuinden dat wi noch bat kennen mochten want mijn herte tuycht mij ia, na

[fol. b6r]

dien dat sy alle die camere doergaens besien hadden. so vonden sy ter sijden der cameren een cleen poertaelken dair af datten slotel aldaer neffens hinc aen eenen horen. sy sloten die dore op ende ghinghen daer inne. ende saghen daer eene cleynachtighe camere van omtrent xij. voeten lanck . ende daer stont inne een oratorie daer te mael puntelicken op een cleyn outaerken stont die maiesteyt ihesu christi. ende op elck eynde vanden outaerken stont een silueren candelaer dair parijs sijn ghebeth dede als hi op ghestaen was ende als hi oec slapen ghinck. Ende daer waren die drie banyeren die paris ghewonnen hadde in de stadt van parijs Ende die drie iuwelen vanden drie ionckfrouwen. ende den cristallinen schilt ende oec den crans die hem vienne gegeuen hadde. doen hi den ternoye in die stadt van viennen gewan Ende als vienne dit sach so was sij versekert dat parijs die ghene was die haer alle die eere gedaen hadde. ende van groter bliscapen sanc sy neder ter aerden. al daer sij een lange wijle bleef ligghende sonder spreken. Ende tot haer seluen gecomen sijnde sprac sij tot ysabeelen Myn lieue suster geloeft sy god onse heere van deser goeder dach reysen. want ick en gesie niet van deser cameren te gherakene. helacen ick hebbe soe langhe begheert ghehadt te weten wie die gene wesen mochte die so wel sanck ende soe sueten gheluyt sloech die mi so bi was ende nv so verre. ende doen begonst haer ysabeele die maniere van doene te misprijsene segghende ende haer toe sprekende in deser manieren Mijne lieue weerde gheminde vrouwe ick bidde v hertelicken dat ghij v doch niet anders en draecht dan soe v betaemt. ende ghi costumelijc sijt van doene op dattet v voer gheene dwaesheit gherekent en worde. ende gebruyct doch uwer goeder synnen. want al yst dat parijs aldus begaeft is Soe moet ghij nochtans aensien dat hi uwes gelijck niet en is van gheboerten. noch oeck van state. want ghi weet wel dat v vele grooter ende moghender heeren te huwelijcke ghesocht hebben die v beminnen ende groote dinghen doer v doen. ghij en behoeft niet die eeren die v parijs ghedoen kan. die welcke dat v vassael ende ondersaet is. Van desen woerden so was die scone vienne seer toernich op ysabeelen. ende sprack aldus in deser manieren tot yzabeelen. Och heere god ick ben wel ongetroest ende weder slaghen van dij in tghene des ick soe langhen tijt begheert hebbe te weten. ick hadde gemeynt dat ghi mij emmers in geender manieren eenighe onghenuechte aen ghedaen en soudet hebben. Ic segghe v voerwair dat ick desen beminnen wille. ende ick gheloue v eest dat ghijt mi weder segghet ick sal mij seluen dooden. ende so suldi sijn die saecke van mijnder doot. want ick en wil noch en mach niet laten tghene dat ic so seer bemint hebbe tot noch toe. ende ic segghe v noch yst dat ghi mi meer dyer gelijcke woerden segget van minen sueten lieue paris, ghi

[fol. b6v]

en sult niet hebben den tijt anderweruen die te spreken. want aenmercte ghi sijn edele condicien ende manieren ghi soudet hem wel anders prijzen dan gi doet En weet ghi niet dat die coninc van vranckerijck woude dattet hem ghecost ware half syn rijcke. ende loduwijc syn sone so vroem ware als parijs. Het begeren so vele notable heeren kennisse ende vrientschap met hem te hebben Besiet doch bi uwer trouwen oft ghij oyt man saecht die bi hem te ghelijcken was. want in hem is alle duecht Na dien dat die fortune my brenghet tot sijnre liefden so is hi mijnre lieften werdich Ende en hebbe ick niet wel reden om hem te beminnen die my so vele duechden ende eer gedaen heeft sonder sijn lijf tontsiene. en is dit niet groote eere voer mijnen vader, dat hi heeft tot eenen vassael den besten ridder vander werelt Heeft myn vader eenighen die doer hem so vele oyt dede, voerwaer neen hi. Mettyen quamen daer twee ioncfrouwen voer die camer cloppen segghende tot vienne, dat sij quame thuerer vrou moeder. doen seyde vienne tot ysabeele. myn sustere na dien dat wi van hier moeten. laet ons nemen van desen iuweelen ende bergense tot dat parijs coemt, ende laet ons syen hoe hi hem daeromme hebben sal. ende so namen sy het collier ende de witte bannier van viennen ende verborghen dat onder haer tabbaerts ende ghingen also ter cameren waert van heer iacob ende sijnre vrouwen Hier na ghenas heer iacob dies vienne seer blide was: