Die historie vanden vromen ridder parijs ende van die schone vienna des dolphijns dochtere

[fol. b2v]

¶ Hoe paris het steecspel wan binnen der stadt van parijs.

TEn drien vren begonst die ternoye ende doen quam te velde seer edelicken gewapent ian sgreuen soen van vlaendren. ende hem quam te ghemoete iohan des hertoghen zone van breuuez ende sy gheraecten beide malckanderen seer herttelijc alsoe datse haer lancen braken. ende ian sgreuen sone van vlaenderen viel ter aerden onder syn paert. Ende dare na quam tegens ian van breuues eduwaert shertogen sone van bourgoendien. ende dese twe ridders stack ian van breuuez af vromelicken tot dat hem genaecte ian perilleux hertoghe van normandien. dien so sterckelicken gheraecte dat hijen warp onder sijn paert. ende brac hem den arme. ende berechten also dat hi niet en wiste weder het dach was oft nacht Ende teghens ian perilleux quaem anthonis a legre tshertoghen sone van carues. ende dede so vele vromicheden dat hi ian perilleux ende oec noch vijf. ander ridders van sijnder partyen af stac int aerde met cracht van wapen Ende tegens antonis alegre quam godefroy van picardyen ende stac anthonis doe also dat hi ter aerden viel, ende dair toe noch vi ander ridders die seer starc waren hier na dede hi so vele wapenspels ende ternoys dat sy allegadere seyden. dat hi deere vander banen gecreech Ende doe quam die vrome riddere parijs te gemoete godefroye sijn glauie gheuelt hebbende. ende gauen malckanderen soe swaren steeck. dat sy alle beyde met gaders den paerden ter neder vielen. wair bij die coninc van vrancrijck hem beiden wederomme ter banen dede gaen. dwelc parijs consenteerde Ende malckanderen weder ghemoetende so gaf paris godefroy eenen alsoe zwaren steeck. als dat den seluen godefroy sijn paert onder hem ter neder storttede. ende dat godefroy ter aerden viel. Maer want tpaert ghestort hadde so wart gheseyt dat het bi des paerts schulden toe quam dat hy godefroy gheuallen was want daer wasser vele die met godefroy seer wenschten metter herten. ende onderschieden voer dbeste dat si wederkeeren souden ten steecspele. Ende paris omme dat hy niet en was bekent en hadde hi nyemande die voer hem sprack. Niet te min die coninc van vrancrijck bevoelde ende wiste wel dat godefroy wel ende ghetrouwelijcken verwonnen was. ende oeck reynliken. ende en woude daeromme gheen onghelijck doen den riddere die van groter machten ende crachten was. ende seynde hem daeromme eenganckx eenen heraut hem segghende hoe die coninc bekende ende wiste dat parijs synen ridder verwonnen hadde. nochtans waert soe dat hy weder ter banen keeren woude wt synder edelheit. hij dade hem seluen grote eere Op dwelcke paris terstont antwoerde. hoe dat die schoonheyt van vyenne soe ouerdraghende was dat in alle die werrelt dies ghelijck niet en was ende daeromme ben ick al bereyt nae

[fol. b3r]

dien dattet den coninck gelieft om haren wille te ternoyen noch een reyse met den seluen riddere Ende mettyen begonst hi teghens den seluen godefroy te stekenne, alsoe langhe tot dat godefroy sonder enich teghenseggen verwonnen was Ende doe keerde die heraut totten coninck hem vertellende dese gheschiedenisse. daer af dat die coninc zeer wel te vreden was segghende dat die riddere te weten paris eenich groot heere wesen mochte. want hij van groter weerden was ende crachtich. ende was van schoonder ende sueter spraken. Daer nae wisselde parijs teghen eenen anderen een paert dat hem eduwaert sijn geselle toeghemaect hadde Ende daer nae ghinghen si wederom ternoyen ende staken malckanderen soe ontsichlicken als dat godefroy ten lesten ter aerden sloech met allen seer gequetst onder syn paert

ALst quam ter vespertijde soe waert die ternoye zoe starck als dat die partijen alle drye ter aerden gheslaghen waeren gheweest. alsoe datter vander syden der schoonre viennen niemant ouer ghebleuen en was dan die vrome riddere parijs alleenlijck. ende vander syden van normandyen drie ridders starck ende machtich. te weten balaxo. smarckgrauen broedere van saluse. ian des grauen sone van aranegiat. ende philips van beyeren. Ende vander syden van constancye warender oeck noch drye andere. Te weten ian van brabant. larer tshertoghen neue van bourgoendien . ende salomon dalenson sgrauen broeder vander marck. Dese begonsten onderlinghe te sprekene als datmen de ternoye schorssen soude tot des anderen daghes, want sy alle gader seer vermoyt waren. Als paris dat sach soe velde hij weder syn lancye. ende hem quam teghens balaxo smarcgreuen neue van saluse. den welcken parijs ten eersten ganghe ter aerden stac onder sijn paert Insghelijcks soe dede hy oeck die ander vyue seer vromelicken ende edelicken. ende behielt alsoe die eere vanden ternoye ende vanden velde