Die historie vanden vromen ridder parijs ende van die schone vienna des dolphijns dochtere

¶ Hoe paris tsteecspel wan inde stede van vienne.

[fol. a5r]

ALs den dach aenquam vander feesten soe was elckerlijck bereet ter banen. ende paris ende eduwaert vonden een plaetse daer si hen heymelicken toemaecten. ende quamen also al int wit toe ghemaect oec ter banen waert op een eynde dair hen dochte datse niemant kennen en soude ende waren beijde seer rijckelicken ghewapent. Alle die andere ridderen ende baenreheeren waren ghekent bi haer wapenen ende deuysen wtghenomen die twee witte ridderen Aleer dat die ternoy begonste so dede die dolfijn ghebieden dat elck ouer die bane synen monstre doen soude Ende mitten gange waest ghedaen. ende sy waren alle gader so wel toe gemaect ende gewapent dat elckerlic seide dattet frissche ridders waren wel toegemaect ende gewapent Mer die amorueste van allen was Eduwaert des conincs sone van engelant want hi was in faijten van wapenen ende ridderscapen seer vernaemt Vienne aensiende alle dese ridderen sprac tot harer ioncfrouwen ysabeele Mijne schoone suster wye dunct v dat amorueselicste dede. ysabeele antwoerde. Eerweerde vrouwe my dunct dat hi ter lieften van v bat dede dan alle dandere. die ghene die den selueren leeu vuert. Voerwaer seyde vienne die twee witte ridderen die gheen wapene en vuerden die vuerden hem bat dan eenighe andere na minen dunckene. niet te min: wi selense schiere syen Die ridders stonden alle bereet

[fol. a5v]

om die wapen te besighen. Eerst quammer een ridder die in syn wapen vuerde een gulden crone dat een coen ende vroem ridder was Ende tegens hem quam die goede ridder eduwaert parijs gheselle die welcke malckanderen alsoe begrueten datse beyde haer lancien braken. ende met dien quamen daer meer ander, daer deen af vanden peerde stortte. ende dander hem vromelicken hielt. sommige ander raecten malckanderen so fellicken dat man ende peert beide ter aerden vielen. elckerlic hadde hem daer omme die eere te behalen van dier feesten Ende doen quam eduwairt des conincs sone van engelant die van vele ridderen den prijs hadde. ende tegens hem quam die starcke riddere parijs die al daer wonderlick wapenspel bedreef ende warp met synre vromicheyt den seluen eduwaert af ter aerden, vanden welken hi ghecreech groten prijs. ende dit gheduerde tot snoenens ten eten tijde. ende alst quam ten auonde waren daer hurer vele vermoeyt ende namen plaetse om te rusten Maer parijs dede noch meer wonders inde wapene dan hi tsmergens gedaen hadde, in sulcker manieren dat nyemant der banen en dorste ghenaken also dat hi den prijs behielt