Die historie vanden vromen ridder parijs ende van die schone vienna des dolphijns dochtere

¶ Hoe ende in wat manieren dat paris ende eduwaert sijn gheselle hem verweerden teghen tien ghewapende mannen diese vanghen wouden.

SIende dese tyen mannen van wapenen dat die twe ridders so wederspenich vielen seiden si. ghi moet mede gaen weder het sij tuwes dancx oft ondancx. ende mettyen begonsten sy te slaen haer handen aen haer messen Dese twee ridders en hadden an-

[fol. a4r]

ders

niet ouer hem dan haer messen ende haer bokelaers. metten welcken sij hen soe seer wel weerden ende bedecten. als datter gheen vanden thienen en was hi en was swaerliken gequetst. ende deden hen die plaetse ruymen weder sy wouden oft niet. also dat dese twee ridders van daer gheraecten sonder schade Des mergens quamen dese thien mannen voir den dolphyn ende vertelden hem haren groten wederspoet ende mesual die hem beiegent was alleenlic bi tween mannen. ende hoe sy met groter schaemten hadden moeten vlien. bouen dien dat deene van hem gewont was int hooft ende dandere inden arme ende dander in die dien. om welcks dinghes wille die dolphijn seer gram was. ende dachte wel dattet mannen waren van groter weerden. also dat hi tsnachts dair nae al daer seynde hondert mannen vanden besten van synen houe. maer dat was al te vergheefs. want die twe ionghe ridders daer niet weder en quamen. ende hielden alsoe dese dinghen heymelicken Als vienne sach dat sy niet en mochte weten wie die speellieden waren. so dachte sy datthet eenighe groote heeren waren die haer beminden, also dat sy ende haer ioncfrouwe yzabeele seer luttel anders daden dan daer af spraken int welc sij hen seer vermaecten. siende paris dat hi niet en dorste tonen die grote liefte

[fol. a4v]

die hi ter schoender viennen waert droech dacht hi dat hi sijn herte metallen ledich stellen soude. ende sloech voertdaen meer gade den bisscop van sinte laureys die hem zeer grote eere bewees, ende goede dingen leerde van onsen here Als de dolfijn sach dat vienne sijn dochter so droeuich was om dat si niet weten en mochte wie die speelliede waren. dede hij beroepen een steecspel in die stadt van vienne, om viennen daer bi te vermaken. ende vienne was dies wel verhoget want sy dachte bi dier feesten te vernemen ghelijc sy seyde tot ysabeelen wie sy waren die gene die haer so beminden Die dolphijn die dede wt roepen ouer alle vrancrijc ende enghelant dat alle die ghene die steecspel ende ridderschap hantieren woude. dat die quame in die stadt van vienne den eersten dach van meye naestcomende. die ghene die hem vromelicst inde wapen hadde dien soude hi geuen eenen costeliken schilt van cristale. ende daer toe eenen crans van bloemen Tegens dien dach bereyden hem den meesten deel vanden heren ende ridderen van vrancrijck engelant ende vlaendren. ende besonder vele baenreheren wt vrancrijck ende engelant die viennen beminden om hare scoonheit wille. Onder die welcke was ian van bourboen neue des conincks van vranckrijcke Eduwaert des conincs sone van enghelant Anthonijs des greuen sone van prouencen. Gheraert des mercgreue sone van montferrat. willem des hertoghen sone van carues Dese baenreheeren quamen aldaer ter liefden van vienne seer edelijcken toe ghemaeckt om vromicheyt te bedriuen Siende paris dat die feeste alsodanich wesen soude dacht hi in hem seluen wat hi doen soude weder hy daer oec wesen woude oft niet. mer die grote liefde die hi droech tot viennen die bedwanc hem dat hi dair hem seluen oec vant. nochtans soe beriet hi hem oec iersten met eduwaert synen gheselle. die welcke hem antwoerdde aldus. eest dat ghijer gaet Ic sal met v gaen. mer wy moeten daer int heymelick oft bedect comen dat wi niet en worden ghekent. Ende metten ganghe deden sy bereet maken harnasch ende peerden ende haer wapenen in huer tinberen ende bereydselen ende aen haer paerden maecten sy al wit sonder ander teeken Doen den dach quaem dyer beteykent was dede die dolphijn maken een scauot oft stellinghe, daer vienne seer rijckelicken op was toeghemaect. ende so suuerlijcken dat hem alle tvolc van hare schoonheit genoech te verwonderen hadde. Die heeren ende ridderen begonsten hem te wapenen ende toe te maken costelicken na die ghise van dien lande Daer waren vele instrumenten van spelen ende gelude dair vienne nernstichlicken na hoorde om te weten oft sy niet en soude connen onderkennen den genen die hair so behertet hadde Paris was genomen dien dach om te dienen den dolphijn ter tafelen. dwelc hi seer bequamelicken dede, hebbende stedeuast die ooghe op viennen. also dat die liefde van hem hoe langer hoe meer wies. nochtans wachte hi hem also dats niemant en wart gheware