Die historie vanden vromen ridder parijs ende van die schone vienna des dolphijns dochtere

¶ Hoe dat die dolfijn sandt tyen gewapende mannen om paris ende eduaert te vanghen daer sij speelden voer viennens camer.

[fol. a3v]

ALs die dolphijn aenhoorde die woerden van synder dochter soe dacht hij in hem seluen dat hi dat weten soude wiese waren ende ordineerde dat ter plaetsen daer sij te comen plaghen thien ghewapende mannen haer heymelijcken wachten souden. ende beual dien dat sy hem lieten spelen. ende als sy ghespeelt souden hebben dat syse dan voer hem brachten. het waren thueren dancke oft ontdancke Ende als die duyster nacht aen quam. so quamen dese twee ionge ridderen parijs ende eduwaert met gaders eenen ionghen die hair instrumenten droech. niet wetende van desen des hier bouen gheseyt is. ende begonsten zoe suetelicken te spelene als sy ye ghededen Ende als sy ghedaen hadden, ende meynden weder te keeren, soe lieten hem sien die tien ghewapende mannen ende gruetteden dese twee met hoescheden hem segghende hoe sy twee met hen moesten gaen toespreken mijn heere den dolfijn. Paris die bat hem dat sy een wenich vertoeuen wouden. hij soude hem daer op antwoerde gheuen. Ende met dien tradt hi een weynich ter sijden segghende tot eduwaert aldus Mijn lieue broeder ghi siet wel in wat maten dat wi staen Ick en name niet gherne dat ghi oneere oft hynder om mijnen wille gecreecht. mer ic segghe v voerwaer dat ick lieuer hadde te steruen dan men ons brochte voer den dolfijn. daerom mijn lieue broeder laet ons besien. wat wij doen selen Oec mede moeten wij des iongen gade slaen die ons onse instrumenten gebracht heeft. want wi bi hem op dat hi ghegrepen ware souden ghemelt syn Ende met dien so deden sy den ionghen tuyswaert gaen. Ende doe seyde eduwaert tot parijs. Mijn lieue bruedere van my en ducht niet. laet ons doen gelijck ghij wilt Doen seyde paris totten tien ghewapende mannen Ghij heren wij bidden v dat ghi ons wilt laten gaen. want wij sijn tot mijns heren des dolphijns besten. ende alle synen heeren vanden houe. ende weet dat wi omme geen dinc op dese tijt voer hem gaen en selen