¶ Hoe paris ende eduwaert voer viennen camer quamen spelen ende genoechte maken.
DOen ouerdroegen parijs ende eduwaert dat sy viennen met spelen vermaken wouden. ende gingen dicwilen des nachts te gader daerwerts daer sy wisten dat viennens camer stont ende songen ende speelden met so groter melodyen ende sueticheden dattet alle gelude te bouen ginc. ende datter die dolfyn ende zyn huysvrouwe ende oec vienne grote ghenoechte in grepen. ende hadden groote begherte te weten wie die wesen mochten die hen die hen die genoechte aen deden. Ende om dat te beuinden so dede die dolfyn toeleggen een groot hof ende bancket ende seynde om alle die speelliede van synen lande, hen beuelende dat sy in persone niet en lieten daer te syne Ende alsmense alle gader hadde gehoort spelen. so en beuant men nochtans niet die gene diemen sochte. dies die dolfijn seer droeuich was. ende als vienne hoorde die speelliede die daer ter feesten speelden sprack sij tot ysabeele hare ioncfrouwe Bi mijnre trouwen myn lieue suster, dese speelliede en geliken niet den ghenen die voer onse camer quamen spelen Het verdriet mij dat ick niet en mach weten wie dat sy sijn. want sijer niet en quamen dan ter lieften van mi.
Auteursrechtvrij