¶ Hier begint die historie vanden seer vromen ridder parijs: ende vander scoonder vienne des dolphyns dochtere. die welcke om getrouwe liefden wille vele wederspoets leden. al eer sy haer minne ghebruycken mochten
TEn tiden van coninc kaerle van vrancrijc int iair ons heren M.cc.lxxi was int lant van dolfinie in een stadt geheten vienne een rijc baenre here dolfyn die men hiet her godeuaert dallenson. ende was van sconincx bloede een seer machtich here ende groot van hem seluen van lande ende van goede ende was een seer wijs man also dat hi doer sijn vroeddom vanden coninc seer bemint was. ende insgelijcx van alle den anderen heren ende baenroodsen vandes conincs houe. Dese hadde te wiue een seer schoone vrouwe geheten dyane ende was so vterliken schone als dat si werdich was dies naems dyane. dat is te seggen negensterre. want sy was vol alder edelheit ende hoosheit die een vrouwe soude ende mocht hebben Dese dolphijn ende diane waren te gadere seuen iaren sonder te vercrighen vruchten. hoe wel dat sij die gherne genomen hadden. ende baden onsen here god dat hi hen een vrucht verleenen wilde. also dat ons heere god aenhoorende haer ghebet, hen int achste iaer verleende een dochter seer schone. dair af doer alle tlant van dolfnie grote blyscap was. ende in teeken van groter liefden deden si die heeten vienne nader stadt dair si inne geboren wert. ende wart voert meer beuolen te bewaren ende te houden eenere groter vrouwen die vander seluer stadt was die welcke oec hadde een ionge maechdeken vander ouder van vienne gheheeten ysabeele. die gelijc met vienne op wies ende wart bider voerster versellet met vienne op dat sy te gader spelen ende hen vermaken souden Dese ghecreghen malckanderen so lief dat deene sonder dander niet ghesyn en conste ende hieten malckanderen ghesusteren Vienne wies van daghe te dage op in wtnemender schoonheyt alsoe datse niet alleen in dolfinye maer oec in engelant ende al omme elder ghehouden wert ende ghepresen voir die scoenste die men wiste. ende dies vele te meer dat sy van alsulcker afcoemst was. doir dwelc si nader hant als sij tharen iaren quam van coningen hertogen ende anderen groten heren dicwijlen te huwelick versocht wart Dese dolfyn hadde te deser tijt binnen zyn stadt een seer edel riddere van ouder afcomst mechtich van lande castelen rijcheden. ende was geheten heer iacob, den welcken die dolfin ende alle tvolc seer lief hadden Dese ridder hadde eenen sone seer schoon die men hiet paris. den welcken die vader in alle dingen dede leeren ende wegen. tot dat hi tsynen xv. iaren comen was, ende daer na dede hy en leeren ter wapenen. ende wart binnen cortten tijden ridder geslagen biden dolfijn Also dat seer corts na dien nyewers ter werelt ternoy noch ridderspel en was. hy en vant hem al daer oeck. In sulcker maten als dat hi ende synen naem ouer al bekent werdt. Ende was ghepresen een vanden
Auteursrechtvrij