Handschrift Berlijn mgo 185
(15de eeuw)–Anoniem Handschrift Berlijn mgo 185–
Auteursrechtvrij
[pagina 188]
| |
Dit is dat sangeboec van der hoechtyt der gebuerten christi | |
[pagina 189]
| |
dit is die wyse dyes et letycie Ga naar voetnoot+1 Tys een dach der vrolicheit
al in des Conynges haue
et heeft gewonnen een maget een kynt
een kynt tot onsen laue
een kynt volmaket wonderlic
ende altemael genoechgelic
nae synre menschelicheiden
syn wesen is onbegrypelic
ende altemael onsprekelic
nae synre godtelicheiden
2 Die moeder is dochter wonderlic
die soen die is oer vader
hoerden yeman seggen des gelic
hi is god ende mensche te gader
hi is knecht ende daer toe here
hi is auer alle dat is meer
onbegrypelic te vynden
tegenwoerdich ende veer
alsulkes wonder des groten heer
ten kangeen man besynnen
| |
[pagina 190]
| |
3 Doe voert quam die gades soen
al van der maget pueren
als van der lelyen roesen schoen
verwandellt hoer natuere
mer dat een maget eenen soen gewan
hi was eer enyges dinges began
sy was in sinen behagen
dat die borsten der reynicheit
gauen melc der kynselicheit
dat was seer olt van daegen
4 Den wakenden hierden god ontboet
des nachtes by oren beesten
mit sinen engelen blyscap groet
een conynck gebaren mit feesten
die gewonnen had een maget
ende hadde hem in die crybbe gelecht
in doekerkyn gewonden
dat kynt dat is der enghelen here
van gedaenten schoen voele meer
dan ye kynt wart gewonnen
| |
[pagina 191]
| |
5 Een glas al heel dat schynt daer doer
ten breket niet vander sonnen
soe heuet ene maget voer ende nae
Joncfrouwe een kynt gewonnen
salich is die moeder dan
die gades soen ter werlt gewan
god ende mensche te gader
die borsten oec wal salich waren
die god in sinen Jongen Jaren
te sugen hadde vercaeren
6 Inden donckere soe wan een maget
een soen der sonnen verlichter
dat kynt waert in den stal gelecht
alder werlde stichter
die moeder hem seluen in den doekeren want
die sternen makeden hi ter rechterhant
doe hi den hemel wrachten
hi screyden als een kyndekyn doet
die wolken dienden hem onder syne voet
doe hi op voer mit crachten
| |
[pagina 192]
| |
7 Doemen alle die werlt bescreef
doe gync die maget swaere
toe betlahem dat si doe bleef
se genas oers kyndes al daere
alsmen scryuet inden hof
daer syngen die engelen gades lof
van nyer eerweerdicheiden
god hier bauen in syn hemelryck
die geue ons menschen op eertryke
enen gaeden wille ende vrede
Amen
Gracias agymus tyby proppter magnum tuam glorie |
|