Handschrift Berlijn mgo 185

[lied 53]

Dyt is die wyse ic quam yn enen bomgaerden ghegaen daert alsoe schoene was ende daer moete my die saerte

1   Help nu maria dichten
een liedeken totter eren van di
Ende wilt myn hartken verlichten
van sonden maeken vry

2   Wes wil ic my vermeten
ick arme creatuer
die worme soelen my eten
^{die doet +} doet staet voer myn doer

3   Maria woe was v toe moede
al buten iherusalem
Och doe ghi uwen enyghen soene
soe droeflick toe ghemoete quemen

4   Doe was my recht toe moede
als ene die staruen moet
Ende ghi seghen uwen enyghen soene
verordelen totter doet

+ Hier is ‘die doet’ later boven het vers toegevoegd. Vervolgens is ‘doet’ weer doorgehaald.

[p. 184]

 

 

 

5   Maria doer uwer mynnen

 

synne ghi hem nae ghegaen

 

al op den barch van caluarien

 

seghe ghi hem aent cruce slaen

 

 

 

6   Wat heeft hi daer ghesproeken

 

ghedaen een schoen sermoen

 

Och vader vergheuet hem hoer sonden

 

want si en weten nyet wat si doen

 

 

 

7   Wat sprack hi totten schaeker

 

ic sals v maken wys

 

ghi soelt noch haden wesen

 

myt my ynt paradys

 

 

 

8   Wie heeft hi daer beuoelen

 

die lieueste moeder syn

 

sante iohans toe enen behoeder

 

dat was die neue syn

 

 

 

9   Ghi heeft syn hoeuet gheneyghet

 

ghesoncken al op syne boerst

 

hi heeft soe lude gheroepen

 

ick hebbe soe groeten doerst

 

 

 

10   Wat heeft hi meer ghesproeken

 

doe hi aenden cruce henck

[p. 185]

 

die schoelt hebbe ick betaelet

 

veruollet is alle dynck

 

 

 

11   Wat heeft hi meer ghesproeken

 

doe hi anden cruce henck

 

Och vader yn uwen handen

 

beuele ic mynen gheest

 

 

 

12   Nu bidde ic v maria

 

doer uwen liden groet

 

dat ghi ons arme sondighe menschen

 

wilt helpen wt alre noet

 

Amen