Handschrift Berlijn mgo 185


[lied 38]
dit is die wyse Dat gaet hier tegen den somer al datmen syngen sal
[pagina 138]
1 Ic drage dat liden verborgen beslaten in mynen gront vanden auent totten morgen werde ic daer af gewont 2 Ic byn alleyn int liden Och lacie ic byn alleyn hoe soldick my verblyden der trouwen en vyndic geen 3 Daer comet soe mennych suchten al wt myns hertsen gront mocht ic des lidens vluchten ic dedet in corter stont 4 Nv ist aldus gelegen ten mach niet anders syn men willes my niet verdragen dus blyuet die sorge myn
[pagina 139]
5 Och wie mach icket bet clagen dan die den troest verleent hi wilt my helpen dragen tys also trouwen vrent 6 Ick wil in hem verblyden ende hapen tot alre tyt dat hi my voer dit liden sal geuen u groet jolyt 7 Die troester van hier bauen die alle herten kent die wille my altoes lauen als hi ons liden toe sent 8 Hy heeft die perse getreden al om die mynne van my ick salt hem weder gelden soe voel alst in my sy
[pagina 140]
9 Hoe voele du kanste gerapen al wt den liden myn dat geue ic di te baten tmoet al geleden syn Amen