Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse. Conditor alme syderum. Oft op. Joseph die was een timmerman. M.VV.DEn dach die schijnt, en compt ons vry,
O Heere Godt wy louen dy:
En dancken u, ghy hoochste goet,
Dat ghy ons den nacht hebt behoet.
Bewaert ons Heere desen dach,
Dat ons reyse goet wesen mach:
Staet ons by met u hulpe daer,
Dat ons gheen sonde quellet swaer.
Regeert ons met u stercke hant,
Op dat u werck in ons becant:
Dijne naem door thgelooue reyn,
| |
[Folio 84v]
| |
Heylichlijck prijse en diene alleyn.
Helpt dat den Gheest hier meester blijft,
Dat hy dat vleesch dwinghet en drijft,
Op dattet hem seluen niet so verheft,
Dattet het eewich verdommen seft.
Sterckt den Gheest dat hi tvleesch afsteeckt,
En synen moet ende wille breeckt:
Dat hem niet in wellusten gheeft,
En als voorheen in sonden leeft.
Versorcht ons oock o Heere groot,
In desen dach van daghelijcx Broot:
Deylt ons u gauen in dit verdriet,
Want onse sorghe helpet niet.
Vordert den arbeyt, en ons doen,
Wilt ons met loon der handen voen,
Door Jhesum Christum dijnen Soon,
Die ons verbid in synen throon.
|
|