Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse. Vatter unser im Himmelreich.GOdt Vader in den Hemelrijck,
God Son, God heilige Gheest gelijck:
Ghy heylighe Drijuuldicheyt,
Een eenich Godt in eewicheyt:
Op u beloefte bidden wy,
Wilt ons ghenadich hooren ghy.
Ach lieue Godt verschoont ons fier,
Doet niet nae onse verdiensten hier:
Ontfermt dy onser ghenadelijck,
Dat ons niet en sy schadelijck:
Beurijt lijf, goet, bloet ende eer,
Verlaet ons nu noch nimmermeer.
Bewaert ons voor den Sathans aert,
Dat hy met listen ons niet beswaert:
Keert toch van ons synen vierighen schicht,
Dat hy ons niet en ouerlicht:
| |
[Folio 63v]
| |
Verlaet niet Heere dijnen knecht,
Als hem die boose weerelt aenuecht.
Bewaert ons Heere van sonden swaer,
Voor dwaling, laste en schande daer:
Voor Chrijch, haet, vyantschap en nijt,
Voor water, vier, en dieren tijt:
Voor Peste, cranckheyt en misual,
Voor onweder ende stormen al.
Behoedt ons Heere in allen noot,
Voor haestighe sieckte ende snellen doot:
Wilt ons Heere toch niet afgaen,
Als wy voor u stranck oordeel staen:
Voor den eewighen doot, o Heere goet,
Door Jhesum Christum ons behoet.
Wy arme sondaers bidden meer,
O Jhesu Christe lieue Heer:
Helpt ons door u Gheboorte vermaert,
Verrijssenisse en Hemeluaert:
Door u lijden, en bloedich sweet,
Door u cruyce en doot seer wreet.
Dijn heylighe Christen Kercke ghemeyn,
Wilt houden in uwen woorde reyn:
Dat haer dienaers zijn onbesmet,
In leeringhe en leuen net:
Stort uwen Gheest crachtich int woort,
Op dattet in ons vruchten brengt voort.
Seynt trouwe Dienaers in dijnen Oest,
Secten en Ketterijen verwoest:
Rotten en valsche Leeraers fel,
| |
[Folio 64r]
| |
Wilt onderworpen u beuel:
Brengt op den wech die niet en faelt,
Die van de waerheyt is ghedwaelt.
Wilt slaen door uwe crachtighe hant,
Al die u woort doen wederstant:
Des Torckens moorden van ons keert,
Dijn Kercke en Christenheyt vermeert:
Die hier moet lijden op der eert,
Wiens bloet voor u altijt is weert.
Beschermt oock lijf,siele, en goet,
Keert van ons Oproer Crijch, en bloet:
Den Coninghen Princen en Heeren fyn,
Gheeft ghenade dat sy regeerende syn:
In alle vrede waerachtelijck,
Sonder strijden eendrachtelijck.
Gheeft onsen Keyser gheluck en spoet,
Die cracht der vyanden te nieten doet:
Beschermpt oock deser Landen Heeren,
En wiltse rijckelijck vermeeren:
Der Steden Raet en Ghemeynte groot,
Wilt oock beurijden wt den noot.
In allen angst met hulpe en daet,
Dijn arme Christenheyt bystaet,
Troost alle herten seer bedroeft,
Helpt hem die hulpens meer behoeft:
Die arme Weesekens beschermpt,
Der Weduwen elende erbermt.
Die beuruchte vroukens ouer al,
Helpt Heere wt noot ende misual,
| |
[Folio 64v]
| |
Sterckt alle siecke en crancke zaen,
Dat haer vertrouwen vast mach staen.
Maeckt die aen haere siele ghesont,
En troostste in den laetsten stont.
Och lieue Heere verleent ghedult,
Die hier veel lijden sonder schult:
Treckt die wt haren vyants cracht,
Verlost en vrijt die door u macht:
Troost hem oock in den laetsten noot,
Die men om u woort brengt ten doot.
Wilt onsen vyant die hier leeft,
Sijn sonden vergheuen daer hy in sweeft:
Gheeft dat wy hem verheffen altijt,
In vredelijck leuen sonder nijt:
Oock allen sondaer so bekeert,
Dat hy u ghenade begheert en leert.
Bewaert die vruchten op dat velt,
Die ghy ghenadichlijck daer stelt:
Voor Haghel, wint, en schade fel,
En dat wy die ghebruycken wel:
Recht matelijck in ons bedrijf,
Sonder verderuen siel en lijf.
O Jhesu Christe Godes Soon,
O Jhesu Christe der ghenaden throon:
O Jhesu Christe Godes Lam,
Dat tswerelts sonden droech en nam:
Ghy heylich Zaet ghebenedijt,
Erbermet u ouer ons altijt. Amen.
|
|