Een hantboecxken inhoudende den heelen Psalter des H. propheete Dauid

Een liedt van die vijf salichheyden. Matheus. 5.

Op de wijse. Dasz seind die Heiligen Zehen Gebott.

CHristus ghinck met zijn Jongheren goet,
Op eenen berch met rasschen spoet,
En leerde daer met zijnen mont,
Des salicheyts vasten gront. Kirieleys.

Salich zijn dArme van Gheeste hier,

Want Godt ontfermet harer schier,
Om dat sy ootmoedich gaen ghelijck,
Daerom toehoort hem Godes rijck. Kirieleys.

Salich syn die saechtmoedich zijn,

Liefde sal hun voorspoedich zijn,
Omdat sy handelen met ootmoet,
Besitten sy Teerdtsche goet. Kirieleys.

Die truerich schreyen, sonder recht,

Christus den Heere salich secht,
En sullen ghetroost zijn en ghespaert,
Als tswerelts vruecht droefheyt gaert. Kirieleis.

Salich zijn die hun gheuen snel,

Om recht en vroom te leuen wel,

[fol. 20r]

 

Diens hongher en dorst rechtuaerdich staet,

 

Daerom sullen sy zijn versaet. Kirieleys.

 

 

 

Salich zijn die met ontfermen groot,

 

Haren naesten helpen, in den noot,

 

Sy sullen ghenade behalen hier,

 

Want Godt salt al betalen fier. Kierieleys.

 

 

 

Wel hem die zijn van herten reyn,

 

Niet soeckende dan Godts woort alleyn,

 

Sonder bedroch en valschen gront,

 

Die sullen Godt sien terstont. Kirieleys.

 

 

 

Salich sal zijn met groot voorspoet,

 

Die vreede soeckt en arbeyt doet,

 

Dat twistich ghekijf tot vreden coemt,

 

Die sal Godts kint zijn ghenoemt. Kirieleys.

 

 

 

Salich zijn die omt Ghelooue recht,

 

Veruolginghe lijden, en worden belecht,

 

Sijt lustich en blijde op dat termijn,

 

Uwen loon sal groot by God zijn. Kirieleys.

 

 

 

Dit zijn die deelen der salichyt,

 

Om te leuen in ghehoorsaemheyt,

 

So Christus leeringhe bewijst,

 

Op datmen Godt loeft en prijst. Kirieleys.

 

 

 

Die sondighe wereldt is seer onuroet,

 

Die Salicheyt soeckt in gelt en goet,

 

Niet denckende dat vergaet subijt,

 

Sonder ghewin oft profijt. Kirieleys.