Een hantboecxken inhoudende den heelen Psalter des H. propheete Dauid

Psalm CXLVIII. Laudate Dominum de caelis.

Is een dancksegghinghe, ende dat alle creatueren Godt louen, ende dancken souden,

[fol. 189v]

want Godt die onderhoudet al, want sonder hem ende synen bystandt soo ist al om niet.

Op de wijse: Es seind doch selig alle die. Oft op den C XIX. Psalm.

GHy Enghelen van des Hemels throon,
Loeft den Heeren doch fijn, en schoon,
De hoochde die beghinne aene:
Loeft hem alle zijne Enghelen schaer,
Alle zijn heyren loeft hem voorwaer,
Loeft hem ghy Sonne, en Mane:
Loeft hem ghy lichtende Sterren al,
Loeft hem oock met seer grooten gheschal,
Ouer al, ghy Hemelen gente:
Loeft den Heeren ras, snel, en oock fijn,
Met alle de wateren die daer zijn,
Hier bouen in het firmamente.

Den naem des Heeren doch lof gheeft,

Sijn woordt alle dinghen gheschapen heeft,
En onderhoudt dat eewlijcke:
Hy maeckt dat het niet anders en moet gaen,
Loeft den Heer op deerd alle diepten zaen,
Oock de Walvischen alle ghelijcke:
Tvier, Haghel, Sneeu, damp, hitte fijn,
Stormwinden die van hem ghemaeckt zijn,
Berghen, en alle hoeuelen,
Vruchtbare boomen, en Cederen al,
Dieren, Beesten, en Wormen al,
En alle vlieghende Voghelen.

De Coninghen op aerden: die liedens al,

[fol. 190r]

 

Princen, en Rechters sonder ghetal,

 

All Jonglinghen, en Maechden met eenen:

 

Doude met den Ionghen, hem niet en schaem,

 

Te louen Godt des Heeren naem,

 

Want zijn naem is hooch alleene:

 

Synen lof gaet soo veel wijder ghewis,

 

Als den Hemel hoogher, dan dAerde is,

 

En den Horn zijns volcx hy verhoocht fijn,

 

Alle heylighen sullen hem louen met gheschal,

 

En die kinderen van Israel oock al

 

Oock alle volcken soo hem dienende zijn.

 

 

 

Lof eer en prijs met soeten thoon. etcetera. 5.