Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse. Ach Herr wie seind meinr feind. Oft op den C XXIIII. Psalm.EN dat huys niet selfs optimmert de Heer,
En besorgt alle dinghen daer inne,
Te vergheefs arbeydt men hoe lange, hoe meer,
En om niet syn dan crachten, en sinnen:
Alle moyte en sorg, te vergheefs oock gaet,
Als Godts hulpe ons niet by en staet,
Allen arbeydt is dan oock verloren.
En Godt niet seluer bewaert die Stadt,
En opboudt de Torens en Muyren,
Daer en helpt dan gheen ghelt, noch menschen raet,
Verloren is al den arbeydt suere,
Als Godt niet selffs niet en waeckt: siet,
Daer is dan all dwachten, en dwaecken om niet,
| |
[Folio 169v]
| |
Alle kunst, en list moet dan vallen.
Daerom aernmerckt en siet het wel aen,
Alle die sonder tghelooue leuen:
En wilt u broodt winnen met vroech op staen,
Maer Godt wilt also niet gheuen:
Maer den Godvreesenden sulcx valt toe,
In hunlieder slaep sy en weten niet hoe,
Die syne ghenade verbeyden.
Des lichaems vruchten dat syn die kindt,
En Godt schenckt ons die al tot Eruen,
Hy gheeftse te loon dien hyse gundt,
Hy en laet oock niemandt verderuen:
Met synen seeghen hy all dinck veruult,
Door hem wordt den hongher, en dorst gestilt,
Wt enckle ghenaed en goetheyt.
Die pijlen die syn in des Ruesen macht,
Als hy daer met gaen wilt ten strijde,
En hy schietse al daer hijt heeft ghedacht,
Ter rechter plaetsen oft ter zijden /
Also syn oock all menschen ionck, en alt,
In Godts macht, en oock in syne ghewalt,
En hy wiltse oock al versorghen.
Daerom laet ons betrouwen op syn woort,
Ende sien op syne handen:
Hy sal ons oock helpen altijts voort,
En ons niet laten comen in schanden:
Onsen Koecker die wilt hy ons vullen wel,
So hebben wy dan al ghewonnen het spel,
Ouer onse vyanden alle.
Eer sy den Vader en den Son. etcetera. 1.
|
|