Een hantboecxken inhoudende den heelen Psalter des H. propheete Dauid

Psalm. CXXII. Letatus sum his quae dicta.

Is eene dancksegghinghe, dat Godt een plaetse gheeft daermen sijn woordt hooren, ende hem recht dienen can.

Op de wijse. Von Himmel hoch da kom ich her. Oft op Christe der du bist tag und liecht. Oft op: All ir knechten, lobt den Herren.

MY verblijdt dat ick hebbe verstaen,
Dat wi sullen int huys des Heeren gaen,
En dat onse voeten sullen staen,
In u poorten o Jerusalem zaen,

Jerusalem is opgebouwt so certeyn,

Als een Stadt die sonder ghebreck is en reyn,
Aldaer men te samen commen sal:
Derwaerts sullen de geslachten opwaerts gaen al.

Principalijck het gheslacht des Heeren,

Om dat Israelsche volck te leeren,
En om te dancken sheeren naem slecht,
Want aldaer sitten die stoelen int recht.

De Stoelen van Dauidts huys eewlijck:

Wenscht Jerusalem gheluck vrindelijck,
Allen den ghenen het seer wel gaen moet,

[fol. 164v]

 

Die u beminnen van herten soet.

 

 

 

Binnen u mueren moet syn peyse,

 

En gheluck in uwen Palleyse,

 

Om mijne broeders en vrinden wil,

 

So wil ick u peys wenschen inder stil.

 

 

 

Om den wille van het huys des Heeren,

 

So wil ick soecken wel so seere,

 

Tghene dat u voor dbest mocht syn,

 

Gheloeft sy Godt inder eewicheyt fijn.