Een hantboecxken inhoudende den heelen Psalter des H. propheete Dauid


Psalm. CXIIII. In exitu Israel de Aegypto. Is eene dancksegghinghe, voor allen tghene dat Godt soo wonderbaerlijck gheschapen heeft, ende noch tselfste regiert, ende dat hy alle creatueren ghebenedijdt.
[Op den naeuolghenden thoon.] Doen Israel wt Egipten trock, En Jacobs huys van daer wech trock, Wt dat gheheel vremde volcke: Doen wert Juda schoon, zijn Heylichdom, En Israel syn heerschappij vroem, Al onder des Hemels Wolcke. De Zee dit siende vloodt van stondaen,
[Folio 150v]
Te rug hem keerde die Jordaen, De berghen spronghen op stoudt, en koen, Seer hooch ghelijck de Rammen doen, De Hoeulen glijck de Lammerkens oock, Die verblijden hun in sulcken loop, Halleluya, Halleluya. Wat was u Zee dat ghy also vloodt, En u Jordaen dat ghy terugtroockt, Doen ghy Israel saecht comen: En dat ghi berghen spronckt der Rammen glijck, En ghy hoeulen den Lammeren ghelijck,
[Folio 151r]
Also hebben wijt vernomen: Voor den gheweldighen Heeren Des Jacobs Godt almachtighen, Beefde dat gheheele aerdtrijck zaen, Die de Steenrotzen veranderen can, In een Waterzee fraey, en reyn, En de Steenen in een water Fonteyn, Halleluya, Halleluya.