Een hantboecxken inhoudende den heelen Psalter des H. propheete Dauid

Psalm. LX. Deus repulisti nos et destruxisti.

Is een ghebedt teghen de orloghe, ende den Krijch, dat Godt wille doch vrede ende pays

[fol. 88r]

gheuen, ende op alsulcken ghebedt volgt dien troost, dat Godt den lande pays gheuen wilt, maer dat hy die Philistijnen, Moab, Edom ende dandere Heyden temmen soude.

Op de wijse vanden tweeden Psalm.

Al hebt ghy ons Heer gheschuert seer,
Noch hebt ghy onse leden, ghenesen:
Deertrijck hebt ghi geschuert: dies Heer,
Maeckt toe haer schueren mispresen:
Herte tropen gheeft ghy, en sueren Wijn:
Gheeft uwen volck sulck teecken fijn,
Dat hun vyanden daer voor vlieden.

Laet ons van uwen beminden zijn,

U recht handt ghenese ons gheele,
Godt sprack (dies ick verblijde fijn)
Ick wil die landen wtdeelen:
Sichem, Suchoth, Gilead schoon,
Manasse, en Ephraim is mijn Soon,
Juda is mijnen Raet, en Hooftman.

Mijnen grooten waschketel Moab is,

In Edom ick vrij gane:
Tot my comt Palestina ghewis,
Godt helptz wt den noodt altsamen,
Want smenschen macht is gheel onnut,
Nu de cracht Godts ons soo beschudt,
Die treedt oock tonder die vyanden.

Eer sy den Vader, en den Son. etcetera. 1.