Een hantboecxken inhoudende den heelen Psalter des H. propheete Dauid


Psalm. LIIII. Deus in nomine tuo saluum me. Is een gebedt dat Godt vande onredelijcke vyanden ende Tyrannen doch verlossen wille.
Op de wijse, vanden XXXI. Psalm. Oft op den naeuolghenden thoon. Helpt my Heer Godt door uwen naem,
[Folio 83r]
Ordeelt my door u cracht bequaem, O Godt verhoort mijn bede: Die woorden mijns monts vaet van stundaen, Op dat ick niet en wordt vertreden. Want vremde die stellen hun teghen my, En die stercke soecken mijn Siele vry, Die u voor ooghen niet en draghen, Siet Heer: staet ghetrouwelijck by my, En beschermt mijn Siel van plaghen. Ghy sult mynen vyanden hun boosheyt, Betalen en hun verstroyen wijdt, Door uwe warachtighe trouwe: So wil ick u dan offren ghewillijck, Tselfst en sal my niet gherouwen. En ick sal oock uwen naem Heer, Midts dat hy so goet is, dancken seer, Want ghy hebt my verlost heden:
[Folio 83v]
Van alle mijn tribulacij seer, Daerom dat ick u had ghebeden. Want mijn oog aen mynen vyandt siet, Haeren lust, sonder eenich verdriet, Dies prijse ick uwen name: Met alle bedroefde herten, soo ghy siet, En die ghy verlost Heer, Amen.