Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse. O Herre Gott begnade mich. Oft op den LI. Psalm.Mijn God, Mijn God, hoe verlaet ghi my,
Mijn huylen is noch al te ver vry,
Van mynen bystandt: O Heere,
Daechs roep ick wel so seere:
Maer ghy en antwoordt my doch niet,
En snachs en rust ick niet, door tverdriet:
Ghy zijt heylich in Jacob,
En woont in Israel met lof:
Onse Voorvaders hoepten in u,
En doen sy hoepten met dbetrou,
So holpt ghy hun wt al hun noodt:
Tot u riepen sy Heer, mijn Godt,
En sy zijn verlost gheworden.
Sy hoepten op u, en sy en zijn niet,
Ter schanden ghecomen, noch in tverdriet,
Ick ben glijck eenen worm bereyt,
| |
[Folio 22r]
| |
Gheen Mensch, door groote mismaecktheyt,
Ick ben gheworden, der Menschen spodt,
En versmaetheyt des volcx, mijn Godt,
Want alle die my aenschouwen,
Die hebben van my een grouwen:
Sy doen hun mondt open ouer my,
Schudden hun hooft, en zijn seer bly:
Hy claghet nu Godt, en helpe hem?
En verlos hem: verhoort hy zijn stem?
Is dat hy lust tot hem heeft.
Ghy hebt my wt mijns moeders lijf,
Voorts ghebrocht, dies ick noch leuen blijf,
Ghy zijt doen mijn hope ghewesen,
En hebt my oock wtghelesen:
Doen ick noch aenden borsten waer,
Mijns Moeders: doen sy my ghebaer,
Doen ick was noch cleyn, en teere,
Sijt ghy gheworden mijn Heere,
Van sMoeders lijf mynen Godt ghy zijt,
Van my en blijft doch nu niet wijdt,
Want den ancxt is my aen ghecommen seer,
Sonder u isser gheen salichmaker meer,
Die my daer wt can helpen.
Groote Verren die omringhen my,
En vette Stieren die gaen oock vry,
Teghen my hun opmaken,
En doen op hun wijde Caken,
Glijck eenen brieschende Leeuwe brult,
Die met te verslinden zijn maghe vult:
| |
[Folio 22v]
| |
Maer ick ben wtghegheten,
Glijck water henen gheuloten,
Al mijn ghebeente dat is verspreyt,
Mijn hert dat is nu alsoo bereyt,
Glijck Was dat gheel ghesmolten is:
Mijn crachten zijn soo verdroocht ghewis,
Glijck droog haer, en droog potscheruen.
Mijn tong aen mijns mondts ghehemelte hinck,
In des doots stof ghy my nu versinct,
Veel honden my omringhen,
Om my ter doot te bringhen:
De boos Rodt beleeft my tallen candt,
Sy doorgrauen so mijn voeten en handt,
Dat ick alle myne beenen,
Mochte tellen met eenen:
En sy aensien my deur en deur,
En deylen mijn cleederen onder heur,
Om mijn Cleedt worpen sy dat lodt,
Sijt doch nu mijnen bystant: O Godt,
Mijn Sterckt, haest u om my te helpen.
Verlost my Eenighe, van het sweerdt,
Die honden die hebben seer begheerdt,
Mijn Siele te mismaken,
Helpt my wt sLeeuwen caken:
En verlost my O Godt mijn Heer,
Vanden Eenhoren, ras, en seer,
Uwen naem wil ick openbaren,
Mijnen broederen dien verclaren,
Ick wil u beroemen inde Ghemeyn:
| |
[Folio 23r]
| |
Ghy die Godt vreest looft hem alleyn,
Prijst hem alle ghy Iacobs, Zaet,
En vreest hem neerstlijck metter daet,
Ghy Israels Zaet alle.
Hy en heeft niet versmaet, noch veracht,
Der Armen ellende, noch zijn gheslacht,
Sijn aensicht van hem niet woud keeren,
Maer verhoorden zijn roepen seere:
Inde Gemeynt ick u dancken wil,
Ende oock u betalen, soo wil,
Ick myne gheloften ghepresen,
Voor die ghen, soo u Heer vreesen,
Laet doch nu soo eeten die Armen,
Datz eens versaet worden acharmen:
Sy louen en prijsen oock Godt den Heer,
Alle die nae hem vraghen seer:
U hert sal eewich leuen.
Aen deynden der werelt wordt gedacht seer,
Datz hun bekeeren tot Godt den Heer:
En voor hem so comen ghetreden,
Alle Heyden om hem taenbeden:
Want hy heeft een rijck eewelijck,
Hy regiert de Heyden gheweldelijck,
Om te bidden, en teeten laet setten,
Op daertrijck alle vetten:
En laet voor hem oock alle die,
So int stof ligghen buyghen hun knie:
Mijn Siel sal in hem leuende zijn.
| |
[Folio 23v]
| |
En een Zaet sal hem dienen so fijn,
Dat het hem sal wel behaghen.
Men sal noch wtermaten seer,
Vercondighen Godts lof, en eer,
En zijne wonderlijcheden,
Den kindts kindt in alle steden:
Sij sullen comen al bereyt,
En preeken van zijn rechtuaerdicheyt,
Den volck dat wordt gheboren,
Dwelck hy heeft wtuercoren,
Door synen lieuen Soon alleyn,
Dat heylich volck die Christelijck Gemeyn,
Die wilt doch O lieue Heere Godt,
Verlossen, wt allen ancxt, en noot,
Door Jhesum Christum, Amen.
|
|