Een hantboecxken inhoudende den heelen Psalter des H. propheete Dauid

Psalm. XXI. Domine in virtute tua letabitur.

Is een ghebedt, ende Prophecije, hoe dat Christus vanden doot verrijsen, eewelijck leven,

[fol. 21r]

ons seeghenen ende ghebenedijden, oock ouer alle syne vyanden victorie hebben sal.

Op de wijse. Ausz tieffer noth. Oft op den C XXX. Psalm.

HEer u cracht verhuecht den Coninck nu,
U salicheyt maeckt hem blijde,
Sijns herten begeerte geeft ghy hem nu,
Ghy en ontsegt hem niet tallen tijde,
Met weldaden, is hy beloont,
En hebt hem seer cierlijck ghecroont:
En deewich leuen ghegheuen.

Hy heeft groot eer in u salicheyt,

Dies salmen hem hier louen, en prijsen:
Met uwen seeghen ghy hem bespreyt,
U aensicht sal hem veriolijsen,
De Coninck, hem op den Heer verlaet,
En door zijn goetheyt hy so vast staet,
Dat hy niet en can gheuallen.

Uwen vyandt plaecht met u handt,

Die uwe Rechten seer haten:
Met u onghenad die verbrandt,
En laet het vier hun haest vaten,
Hun vruchten die vernielt ghy fijn,
Ghy maeckt dat hun zaet te niet moet zijn,
Onder alle menschen kindren.

Teghen u maeckten sy hun aenslach,

Maer noyt sy dien volbrachten:

[fol. 21v]

 

Inde vlucht slaetse met eenen slach,

 

Uwen boge sy niet en achten:

 

Teghen hun aensicht dien spandt seer:

 

Met uwe cracht verheft u Heer,

 

Op dat wy u macht hooch prijsen.

 

 

 

Eer sy den Vader en den Son. etcetera. 1.