Een hantboecxken inhoudende den heelen Psalter des H. propheete Dauid

Psalm. XIX. Celi enarrant gloriam Dei.

Is een Prohecije, hoe dat het Euangelie ouer de geheele werelt verbreydt, en de vruchten doen sal, want het sal leeren vrolijc, ende vroom syn, ende sal het volck stantaftich maken.

Op de wijse. Wo Gott der Herr nicht. Oft op den C XXIIII. Psalm.

DE Hemelen die vertellen Godts Eer,
Oock de sterren in alle landen:
Oock tfirmament gheeft ons die leer,
Deenen dach, die segedt den andren:
Deenen nacht die seghedt den andren ghewis,
Gheen reden noch spracke daer en is,
Daermen niet en hoort haer stemme.

Ouer tgheel aerdtrijck is wtgegaen,

Haer stem aen sweerelts eynde:
Hy heeft die Sonne een hutte zaen,
Ghemaeckt sonder yet te scheynden:

[fol. 20r]

 

Sy comt daer wt ghelijck dat doet,

 

Een Bruydgom wt zijn Camer goet,

 

En ghelijck eenen Reuse.

 

 

 

Sy gaet wt, wt des Hemels Troon,

 

Van deene plaetse,in dandre,

 

Niemandt en can hem verborghen schoon,

 

Noch hare hitte verandren:

 

De Wedt des Heeren is onbesmet,

 

Sijn getuygnis is claer en nedt,

 

Die selfst maeckt den simplen wyse.

 

 

 

De Heere straft zijn kindren te recht:

 

Die Siele verblijdt synen wette,

 

Syne gheboden zijn claer, en slecht,

 

Dooghen maken sy suyuer, en nette:

 

De vrees des Heeren is heylich, en reyn,

 

Sijn gheboden blyuen eewlijck certeyn,

 

Bouen tgoudt en hoenich ghepresen.

 

 

 

Daer door voorsichtich wordt u knecht,

 

En diese hout heeft grooten loone:

 

Wie can aenmercken de faulten slecht

 

Den stouten en wilt niet verschoonen,

 

Soo sal ick sonder smette zijn nu:

 

Mijn shertens spreeken laet commen voor u,

 

Heer mijnen troost en verlosser.