Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
Auteursrechtvrij
[Folio 15v]
| |
Op de wijse. Nun freucht euch lieben Christen gmein.BEwaert my Heer, want ick u betrou,
Ick seyde tot den Heeren,
Ghy zijt de Heer, ick en heb nu,
Niet goets om u te vereeren:
Maer den rechten heylighen dijn,
Die op deerd, in u gheloouen fijn,
My ghelust seer die, te dienen.
Der Godloosen afgoden zijn veel,
Daer sy haestelijck nae loopen,
Drinckoffrand, ick hun niet offren en wil,
Noch bloetoffrand met hoopen:
Noch ick en sal tot gheender stont,
Hun namen niet noemen met mynen mondt,
Noch oock vremde Goden niet dienen.
Want God is mijn deel, en mijn erfgoet,
Dat hebt ghy my bewaert voor allen,
Nae mijn begheerte, is dat lodt goet,
My, seer lieffelijck toegheuallen:
Een kostelijcke erue is het my,
Daerom wil ick Godt louen bly,
Die my dat heeft ghegheuen.
| |
[Folio 16r]
| |
Snachts hebben my seer ghecastijdt,
Mijn nieren, met groot lyden,
Voor ooghen heb ick Godt altijt:
Hy staet aen mijnder syden,
Daerom soo sal ick blijuen wel,
Met blijder herten sonder ghequel,
Mijn Eer verblijdt haer seere.
Mijn vleesch inde hoep rusten sal:
Want ghy Heer en sult niet laten,
Mijn siele in het helsche dal:
Maer u handt die salse vaten,
Ghy sult niet toelaten dat dheylighe dijn,
Die verderffelijckheyt sal aensien fijn,
Maer mijn vleesch sal seker ligghen.
Den wech sult ghy Heer wysen my,
Die daer leyt ten eewighe leuen,
Want volcomene vruechde, is hy by,
Die ghy alleen sult gheuen,
Door uwen ghesalfden Ihesum Christ,
Want het lieflijck wesen eewlijck is,
By uwe rechte handt. Amen.
Eer sy den Vader en den Soon. etcetera. 1:
|
|