Haerlemsche eerlycke uren, bestaende in korte sin-spreucken, kloecke antwoorden, en vreemde bejegheninghen

Blintheydt is veelderley.

SEkere oude Matrone in de Kermis Kraemen

[p. 97]

gaende, sagh in eenighe Spieghels daer te koop staende, haer meerderjarige, onbehagelijcke en gefronste Tronie: Zy dus staende te kijcken, vraegt haer den Cramer, Moeder schort'er een Spiegel? (Wat seyde zy) soude ick met u Spieghels doen? zy sijn verflenst, men maeckten in mijn jeugd al veel helderder glasen, daer d'Aengesichten schoonder van Vel, en blijder van gelaet in stonden.

Een Yer te London in Engheland komende, sach in een Kramers Winckel een Spiegel hangen, en alsoo hy in sijn Landt noyt sulck tuygh gesien hadt, seyde hy teghens zijn Dochter, die daer by was: Siet, wat een brave Camer is noch daer achter. 't Welck de Winckel-Jonghens wel dapper dede lachen.