Haagse liederhandschrift

111. [Een selich wijf van jongen dagen]

[Vanden Fondamente]

[fol. 66rb]

 

Een selich wijf van jongen dagen

 

Hoerde ich zus in eenre stat

 

In eener goeder geselscap vragen,

 

Daer sij in hoger vruden zat.

5

Haer vragen ic aldus verstoet:

 

"Of 't ware een man van goeder aert,

 

Die leggen woude lijf ende goet

 

An eenen casteel ongespaert,

 

So moesti dan een fondament

10

Sueken, dat hem niet begave;

 

- Want mennech dicwil is ghescent,

 

Omdat hem 't fondament ghinc ave -

 

Ende als hi dan hadden vonden

 

Een stat, die noyt wert gebout,

15

Ende hi daer in corter stonden

 

Calc doet brengen, steen ende hout,

 

Ende so rikelike scone

 

Dede bouwen den casteel,

 

Dat men onder ts'emels trone

20

En mochte geliken dat juweel -

 

Als dan na siin vermogen

 

Had gemaect so scone ende sterc,

 

So mochti wel in goeden hoghe

 

Leven, als hi dit werc

25

Te sinen vreden mocht anscouwen

 

Ende besitten mit gemake -

 

Nu vrage ic ridderen ende vrouwen:

 

Of dit huus dan viel ende brake,

 

Welke men hem best raden soude,

30

So een nieu fundament te legen,

 

Of dat hi weder wracht op d'oude?

 

Wie sal hier siin best af seggen?"

 

 

 

Doe si haer vragen had gevraecht,

 

Yeghelic sprac, dat hem goet dochte.

35

Ic bad der sueser, werder maecht,

 

Of ic dat solveren mochte.

 

"Ja, ghi meester, het's mi wille",

 

Sprec haer roeder mondelijn,

 

"Men sal u maken een ghestille

[fol. 66va]

40

Van al dengenen, die hier siin."

 

"So willic u dan reden togen:

 

Men vint opten dach van heden

 

Casteel so neder noch so hogen,

 

Hi ne mocht werden wel bestreden.

45

Mit voirraden (geloeft mi dat)

 

Heeft men dicwile borge ende huse

 

Ende oec menge grote stat

 

Ghedaen herde groet confuse.

 

Mer als van hem selven (dat verstaet)

50

Een scoen casteel valt ter neder,

 

So is dat fundament dan quaet,

 

Men sal daer niet op bouwen weder.

 

Ich beb dicwille horen spreken

 

Wisen luden (dat sijt vroet):

55

Men mach eenen boem wal breken,

 

Nochtan blijft die wortel goet.

 

Daerom sal men laten niet,

 

Men sal ter wortel nemen goem;

 

Al waer haer dit misvael gesciet,

60

Si mocht noch werden wel een boem,

 

Ende mit veel sueter vrocht becliven,

 

Dan si te voren hadde gedaen.

 

Alle gueten, werden wiven

 

Ghevic hier exempel aen."

 

 

 

Explicit