Haagse liederhandschrift

103. [Ene camere heb ic geraect]

Ene camere heb ic geraect,
Die mi duncke van sulker maect,
Wat ic daerin mochte besluten,
Dat soude bliven wael in mute;
Ende wat ic mach daer bringen in,
Dat ic des ummer seker ben.
Dese camere is so reene,
't En mach van houte noch van stene
Niement maken haers gelike
Noch, die leeft in erderike.
Dese camere is so goet,
Dat ic dencke in mienen moet:
Mocht ic in die camere wesen,
Al druefde ic, ic soude blide wesen!
Ic moet er selve buten bliven,
Al soudmen mi daeromme ontliven.
Des moet ic drueven ende trueren
Nu ende echt te menneger uren.
Dese camere is gemaect met liste,
Ic waen, niemen sulken wiste.
God, laet dese camere staen,
Want er doget ende eere leget aen,
Ende geven haer alles des genoech,

[fol. 63rb]

 

Des der camer is ghevoech.