Haagse liederhandschrift

12. [Die ene stede bezeten heeft]

Die ene stede bezeten heeft,
Daer reden ende recht leeft,
Die sal men eren om die stede
Ende oec om sin rijchlichede,
Al war hi uut Beyerlant geboren.
War hi tot dien stoel vercoren
Ter wage, dar men 't recht sal gronden,
War hi dan in dien gevonden,
Dat hi den stoel gelike doet,
Den sal men houden over vroet:
Den goeden vroeden sal men eren,
Wildi na mine worde leeren.
Och, die dat toe brengen mochte,
Dat d'een om tsanders orbors dochte,
So bleve onse goede volc bi goede,
Maer ummer is mi in den moede:
Dat die rike stad te Romen
Te groeten vordeel was gecomen,
Dat dede, men plach dar woel te doen-
Nu woent die paus tot Avenyoen.

Bezint!