De Gulden Passer. Jaargang 58-59

125. T'voorhooft en is niet te betrouwen.
Tot Achilles Statius van Portugael.

Al wat God oyt schiep int water oft te lande
Heeft een teecken waer aen datmen lichtelic kent
Sijn nateur, die seer diuersch is en meniger hande.
So openbaert den hont sijn gramschap die is gewent
Te bassen op alle die hem comen ontrent.
En met sijnen hoornen laet oock blijcken den stier
De dullicheyt die in hem altijt is geprent.
T'serpent draget fenijn in sijnen steert seer fier,
En voor den schorpioen canmen hem ooc wachten hier.
Maer de mensch heeft een voorhooft, d'welc bloot en naect is,
Daer wt datmen hem niet en can kennen schier
Oft hy goet oft quaet inwendich gemaect is,
Om hem in tijts te wachten eer datmen geraect is
Aen yemant die erch en boos is in al sijn daden:
Hier hebdy een tafereel, d'welck ongelaect is
Wel geschaeft, en met geen geschrift beladen,
Om in te schrijuen, hoe die ghy sonder versmaden
So lange als vrient gedient hebt, met v heeft omgegaen.
Maer (so my dunct) ghy en willes niet bestaen.