De Gulden Passer. Jaargang 58-59
(1980-1981)– [tijdschrift] Gulden Passer, De–
Auteursrechtelijk beschermd
[pagina 38]
| |
Een licht en bewaerster is door haer belijt.
Een moeder der waerheyt, louende de goede.
Gonst en drijft haer niet, tegen eygen affectie sy strijt. Niet ordeelende laetse elc ordeelen als de vroede,
En van t'begin verhaelt zijt al met coelen moede.
Neffens dese volcht Rhetorica, die veel meer spreect,
En de sake voor den Rechter verclaert met voorspoede,
Hebbende een lanc cleet daer geen cieraet aen en gebreeckt,
Willende haer sake winnen met woorden wel gereect,
Des sy haer ooc verciert met coleuren schoone.
Datse met opender hant staet, en met een lance steect,
Bediet, datse soetelick van ver is gewoone
Te vangen die luysteren na haer woorden ydoone.
Daer na volcht Dialectica rou van fatsoene
En ongeschickt niet schijnende ten toone,
Nochtans pijntse haer subtijlic te spoene
Om de verholen waerheyt te brengen coene
Wt den putte daerse leyt verborgen in.
Van bijts coemtse, en die tegen haer heeft te doene
Houtse vast gevangen mits haren loosen sin,
Niet willende wijcken van haer recht en gewin
Sy sleect, leyt lagen, en regeert met reden goet,
En vreedelic bintse met benautheyt niet min.
Ooc gelijctse d'licht der Manen, dat metter spoet
Verandert, Maer dees dry sonder de letteren soet
Mogen v luttel helpen, want sy des arbeyts swaer
Fundamenten zijn daer men op timmeren moet:
En niemant en can yet maken dat blijuen sal hier naer,
Die Grammaticam niet geleert en heeft, dats claer.
D'Historie gelijct by eenen vliegenden hont.
Rhetorica by een Chimere, en Logica eenpaer
By t'Sphynx, dees draecht een maecht als een colonne ront.
|
|