De Gulden Passer. Jaargang 58-59

99. Ongheachte dingen groeyen wel.
Tot Adrianum Iunium den seer vermaerden Medecijn.

Hoe sietmen t'veyl groeyen en om hooge climmen

Al ist ongheacht en van niemanden ghebout:
So sietmer vele verdruct door des nijts grimmen
Die de deucht bouen al verheft sonder fout,
En ten lesten groeyen van selfs, want het onderhout
Wijsheyt, die in hen (als tserpent int veyl) woont altijt.
Door v verstant suldy door al de werelt stout
Floreren, al ist dat ghy ghesen zijt
Tot Haerlem, daer ghy wilt schuylen vry van haet en nijt.
Corts sal haer de gonste der Princen en heeren
Openbaren om v te beschencken met iolijt.
O nijdigen wille waerom brengdy in verseeren
De goede herten? condy uwen dorst keeren
Met deucht en eerbaerheyt te verdrijuen ouer al?
En queldy v selfs niet, als ghy door tvermeeren
Van eens anders welvaert, wort van honger smal?
Dees pene v Momus en Zoile noch comen sal.