De Gulden Passer. Jaargang 58-59

86. Den val voldoet altemet de nature.

Moet ghy niet seggen al die oyt saecht wonders yet,

Oft noch meynt te siene tot eeniger uren,
Dat veel dincs door gheualle gheschiet
Daer door der naturen loop met vremde curen
Volbrocht wort: als doen een vry sonder truren
Een soch was iagende van wreeden aenschijne,
En die doorstekende bracht in s'doots besuren,
Waer door haer biggen ten dien termijne
Wt quamen, diese nau en sou hebben met pijne
Leuende connen baren, brachtse voort
Doot zijnde by gheualle: so is Bacchus diuijne
Gheboren dat den blixem sijn moeder had' vermoort,
En gelijc hy twee moeders heeft, dat noyt en is gehoort,
So hebben oock dese viggen mede,
Een diese droech, en een die den buyc heeft deurboort
En de soch liet en gaf so t'licht ter seluer stede.