De Gulden Passer. Jaargang 58-59

[p. 25]

21. Ongeschickte vleyerie.

Om datmen den grooten Alexandrum onueruaert
Soude meynen wten Hemel ghecomen te zijne,
So heeft hem Appelles de Schilder vermaert
Eenen blixem inde hant geschildert diuijne.
Maer dat berispte met recht telcken sijne
Dien mishaechde dees vleyerie sonder verstant.
Lysippus de Beeltsnijder van copere mijne
Maecte Alexandrum met een lanci inde hant,
Seggende die bat te betamen den Coninc vailiant.
Ia Iulius als hijt al had gebracht t'ondere,
En wilde niet Regeerder maer Gebieder plaisant
Ghenoemt worden: oock blixem en dondere
Veruaren de menschen, sulck werc besondere
Sietmen van goey Coningen noch Princen comen niet:
Maer Pallas schilt en spies ist teecken der vromen siet.