En gaf noyt sulcx lichtelic den mensche sterflick hier.
Want de snelle fame gaet ouer al euen seere,
Hoe dat ghy alreets dry croonen zijt verwerflick hier.
U heeft Roomen vercosen een Coninck erflick hier,
Die een moeder is der wetten en Latijnschen rijcke,
U gheuende tijtel en naem onafkerflick hier
Van Augustus: der Keysers triumphen autijcke
Vernieuwende, door datter gebeuren sal publijcke.
U roepen oock van Hongarien d'uyterste palen
Tot haren Coninck, die met grooten onghelijcke
Tot noch toe verdruct geweest zijn door zo veel quaelen,
Biddende dat ghyse wtet gewet wilt halen
Der Turcken, dier so veel hebben ghebracht ter doot,
Op datse door v versterct, mochten betalen
Haer vianden, die so dic met haren bloede root
De wateren geverwt hebben der Donouwen groot.
Oock heeft v Bohemia (met boomen seer dicht
Rontsomme beset tot haren Coninck minioot
Nu ouer langhe gehadt, waer door sy seer licht
In haren eersten staet seer vast sal worden ghesticht:
Dees Rijcken strijden voor v al t'samen eenpaer,
En ontsien alleen v Coninclick ghericht,
Hopende dat ghy wt so veel perijckelen haer
Verlossen sult, brenghende in corter stonden
Allen volcken weder een gulden werelt claer,
Op dat onder v peys en vre werde beuonden
Duer al, en dat alleene (dits haer vermonden)
Ghy een Rechter en beschermer der weerelt blije
Sijn soudt, ende dat t'uwer liefden wt alle gronden
Den twist der Religien tot desen tije
Werde gheroeyt, en dat elck met herten vrije
Eenen God aenriepe salich en voorspoedich.
Dits dat elck wenst die wijs is int enge en wije,
En dat t'volcs stemme roept des toecomens vroedich.
Het Spaensch regiment heeft in v ioncheyt moedich
U gheleert, en t'perijckel des doots versmadich
Daer ghy in vielt, door t'siagens dwalen onbehoedich,
Hoe groot dat uwe crachten weldadich
En v verstant zijn soude, en dat ghy genadich
Thooft des werelts, noch werden sout, van elcken bemint
Ia der menschen geneuchte, wijens lof sucadich
Alle Poëten singen souden wel ghesint.
So heeft dan d'opperste Godt in den Hemel bekint
U met d'aldermeeste ghiften en swerelts percken
Beghaeft, regerende al wat u is ontrint.
Want Iuppiters vogel, so elck mach mercken
U brenghende is dry croonen met sijnen vlercken,
Waer af de Roomsche de principaelste is voorwaer,
Welcke een Goddinne altijt tot haers verstercken
Bewaert, oock heeft een wolfinne wt deernisse daer
De tweelingnen met haren mammen gevoedt seechbaer
Gheuende t'beginsel der Romeynscher stede,
Die met haerder rechter hant eenen olijftack swaer
U biedende is, met eenen vasten vrede.
En dat ghy voor als sorge dragen wilt, dits haer bede.
Noch zijnder de seuen Riuieren, die onderdaen
Uwen sceptere in Hongarien mede
T'selue begheeren, gheuende v te verstaen
Hoe dat een Coninck altijts so moest zijn bevaen
Met sorgen, ghelijck sy zijn int loopen gestadich,
En toesien in alle plaetsen daert qualick mocht gaen:
Dat wilt en begeert de droeue Maecht beladich
Mette wapenen: by haer is staende beradich
D'altemmende Deucht, en den witten leeu seer fier,
Die t'hooft is alder wilder dieren onversadich,
Den welcken die van Bohemien nu geuen hier
Hem seggende te sijne d'alderstercste dier,
Onder v, O Maximiliaen verheven.
Maer met corten woorden wil ick verhalen schier,
Wat hope uwen vaderlande is ghebleuen,
Dats, dat sy door v noch sal sonder sneuen
Een eynde vercrijgen van al haer verseeren,
En dat ghy, hebbende alle boosheyt verdreuen,
Binnen Bizantien sult stellen t'uwer eeren
Tropheen, die v victorien sullen leeren.
En dat onder v de Religie pure,
Met de Eerbaerheyt corts sullen wederkeeren.
Verre sal vertrecken alle onweder sture,
Sonder eenige wolcke tot elcke ure
Sal den Hemel altijt blincken: in alle länden
Salmen v alleen Coninc groeten goet van nature,
En als ghebroken sullen zijn ws lichaems banden,
Suldy wederom keeren tot sHemels panden,
Daer ghy een gesternte claer voor uwen gheeste
Alleen besitten sult, weerdich der offerhanden.
Nu dan ghy die zijt van alle Coningen de meeste,
Wilt goedertierlick ontfangen dat ic volleeste:
En (gelijck ghy plaecht) wilt ionstich sijn ghenegen
Tot Sambucum, die hem kent t'sijn in elcke feeste
De minste uwer dienaren: maer versterct hier tegen
Wt liefden, derre dees dingen niet om wegen
Presenteren, alsulc eenen Heere onvervaert,
Mits dat hy v goedertieren in al v plegen
Altijts bevonden heeft, v biddende ongespaert,
Ontfangt dit giftken, dat ick onbeswaert
Onlancs wt recreatie binnen der stat
Van Ghent, wijt door haren edelen Borgers vermaert
Ghemaect heb, altijt soeckende des eenicheyts schat.
Willet ontfangen tot dat ick vergaert hebbe wat
Om uwe seer groote deuchden en daden
Met luyder stemmen te vercondighen bet:
Want ick loop ouer al, soecken in alle paden
Wat t'uwer eeren noch mocht comen in staden,
O Prince groot, sonder cost oft arbeyt te sparen,
Om oude boecken (die my niet en mogen verladen)
Medalien, en Marmorsteenen te vergaren.
Dit pijne ic my al neerstelic te bewaren.
Op dat ic soude mogen (die cleyn ben van state)
Dienst doen eenen machtigen Heere, en ooc verclaren
De daden mijns lants, den nacomers te bate.
Wat ic vercrijgen can, als getrou onderesate,
Sal ick int weerkeeren stellen t'uwen faueure,
Die ic bidde dat my niet en verlate.
Leeft, vaert wel, regeert Oost en west sonder getreure
En wort bemint van elcken alle de werelt deure
V.M. onderdanighe Sambucus.
|
|
Auteursrechtelijk beschermd
