De gheestelycke vryagie

Noch een gheestelijck Liedeken, hoe de Bruydt seydt dat Iesus haer lief alleen is: Op de wijse: Alsoo't begint.

Iesus van Nazareene,
Mijnen Bruydegom ydoon:
Ghy zijt mijn lief alleene,
Maeckt toch in my uwen throon,
Met allen deuchden schoon,
Soo verciert de ziele mijn,
Ghy zijt v dienaers loon:
Lof moet v altijdt zijn.

Wel saelich zijn sy gheboren

In dese werelt wijdt,
Die v hebben wtverkoren
Daer ghy de liefste zijt:
Al lijden sy om v strijdt,
V liefde verlicht hun pijn:
Mijn lief ghebenedijdt,
Lof moet v altijdt zijn.

[p. 328]

 

Ghy zijt mijn lief alleyen,

 

Die mijn ziele seer verheught,

 

Maeckt doch mijn herteken reyne,

 

Dat ghy in my woonen meucht:

 

Verciert in my v deucht,

 

Bouen goudt en peerlen fijn:

 

Ghy zijt gheheel mijn vreucht,

 

Lof moet v altijdt zijn.

 

V soete lieflijck wesen,

 

Mijne ziele seer aenkleeft,

 

Ghy moet wel zijn ghepresen,

 

Gheen schoonder daer en leeft,

 

Die alsulcken schoonheydt heeft

 

Als ghy mijn medecijn:

 

Ghy die alle schoonheydt gheeft,

 

Lof moet v altijdt zijn.

 

V liefde gaet bouen maeten,

 

Die ick in v beuin,

 

Om v soo will ick laeten

 

De werelt met haer ghesin,

 

Want daer en is niet in

 

Dan boosheydt en venijn:

 

Ghy zijt die ick bemin,

 

Lof moet v altijdt zijn.

 

V goedtheydt onghemeten,

 

Die is seer delicaet,

 

Die't proeuen sy moghen 't weten,

 

Dat zijt al te bouen gaet:

 

Sy is soeter dan eenich granaet.

 

Oft dan eenighen goeden wijn,

 

Ghy zijt mijn toeverlaet,

[p. 329]

 

Lof moet v altijdt zijn.

 

Waerom wil ick beminnen

 

Creaturen bouen v,

 

Ick sal in v beuinden,

 

Meer dan ick in haer souw,

 

Haer liefde is naermaels rouw,

 

Al gheeft goeden schijn,

 

Maer ghy zijt gantsch ghetrouw:

 

Lof moet v altijdt zijn.

 

Prince van grooter weerden,

 

Aenhoort toch mijn gheklach:

 

Laet my op deser eerden

 

V dienen nacht en dach,

 

Op dat ick aenschouwen mach

 

V lieflijck klaer aenschijn,

 

En roepen al sonder verdrach,

 

Lof moet v altijdt zijn.