Ghebedt.
O Salighe maget Maria, laet ons door v eenen toeganck hebben tot uwen Sone, op dat hy door v ons ontfanghe, die ons lieden door v ghegheuen is. Dat uwe oprechticheydt by hem verontschuldige de schult onser bederffenisse ende uwe ootmoedicheydt, die Godt soo aenghenaem is gheweest, vergiffenisse vercrijge voor onse ydelheydt ende houerdije. Laet uwe ouervloedige liefde bedecken de menichte onser sonden. Ende laet uwe glorieuse vruchtbaerheydt ons aenbrenghen de vruchtbaerheyt der goede wercken. O onse Vrouwe, onse middelersse, onse voorsprake, recommandeert ons aen uwen Sone, versoent ons met uwen Sone, presenteert ons aen uwen Sone. Maeckt, o ghy ghebenedijde, door de gratie die ghy hebt verdient, door de bermherticheydt die ghy hebt ghebaert, dat den ghenen die door middel van v hem geweerdicht heeft te worden deelachtich van onse kranckheydt ende ellende, door v voor-bidden ons oock make deelachtich van zijn salicheydt ende glorie: Iesus Christus uwen Sone, onse Heere, die bouen al gebenedijt, ons in der eeuwicheydt, Amen.
Auteursrechtvrij