De gheestelycke vryagie

[p. 292]

Hier heet de Bruydt haeren Bruydegom anderwerf willecom,

Willecom zoete Iesus mijns herten lief,
Wilter ghy af maecken v gherief.
Al datter is, is t'uwen besten,
Vergheeft en vergheet alle oude resten:
Ick danck v, dat ghy neemt v patientie,
In een herte van soo kleynen penitentie,
Dat sy soo kleyne is, dat is my leet,
My te beteren ben ick bereet.
Ghy zijt den Heere dient al toe-behoort,
Weert daer wt al dat v verstoort.
Verbetert in my al datter is quaedt,
Verandert al dat niet wel en gaet:
Raept op al datter leyt gevallen, maeckt datter is gebroken,
Suyuert datter is vuyl, opent datter is gheloken,
Sterckt datter is kranc, verlicht alle duysterhede,
Paeys, ruste, en vrede kryghe in my stede.
O zoete Iesus, God tinder eeuwicheydt,
Gheeft my wat van v schoonicheydt:
Ghy zijt vol van edele en schoone juweelen.
Wilt y wat van v properheydt deelen,
Ghy moet my vercieren met v baghen,
Soud' ick uwen Vader konnen behaeghen,
Die in v heeft groote vrede en vreuchdt,
Wilt my mede deylen van v deucht.

FINIS.