Een gheestelijck lust hofken

LXVI. [O Heer, mijn God: mijn Schepper pure]

Op de wijse: Van u droefheyt wilt ontspringen.

O Heer, mijn God: mijn Schepper pure,
Gy kendt mijn kranckheydt en natuere
Gy weet mijn onperfectie quaet;
Wilt my bewaren, stueren, leeren,
Dat ick magh konnen t'uwer eeren
In eenen Heyligen goeden staet.

Wilt my, etc.

V soete liefd' heeft my ontsteken:

Inwendigh komt ghy tot my spreken
Door uwen soeten wijsen raet;
Dat ick de werelt sal af-snijden,
Om u te dienen t'allen tijden
In eenen heyligen goeden staet.      Dat, etc.

Somtijdts ben ick van goeden wille

Om u mijn Godt te dienen stille,
In alle deuchden delicaet;
Maer door my kan ick 't niet volbrengen,
Dus wilt my door u graci' brengen
In eenen heyligen goeden staet.

Maer door, etc.

Mijn vlees soeckt sijn gemack te houden,

[p. 140]

 

Dit doe u liefd' in my verkonden,

 

Want traegheyt treckt met haren draedt:

 

Wilt dese traegheyt van my jagen,

 

Dat ick u soete jock magh dragen

 

In eenen heyligen goeden staet.

 

Wilt dese etc.

 

Wilt my u goede graci' geven,

 

Dat mijn jonck herte wordt gedreven,

 

Om te vercieren metter daedt,

 

Een zaligh oorden op der aerden;

 

En dat ick daer in maegh volherden,

 

In eenen heyligen goeden-staet.

 

Een zaligh, etc.

 

Laet my u gracy niet verliesen

 

Dat ick dat beste deel magh kiesen,

 

Dat alle dingh te boven gaet:

 

Hier wel te leven al mijn dagen,

 

Na uwen wil en wel behagen;

 

In eenen heyligen goeden staet.

 

Hier wel, etc.

 

O Heer! ghy kent alle mijn saecken;

 

Wilt my devoot en vyerigh maecken,

 

Verhoort mijn bede vroegh en laet:

 

Dat ick met ziele en lichame

 

V hier magh dienen seer bequame

[p. 141]

 

In eenen heyligen goeden staet.

 

Dat ick, etc.

 

Princelicke Bruydgom schoone,

 

Gy zijt mijn glorie, ende kroone;

 

Geeft my een Geestelick cieraet:

 

Wilt alle quaet hier van my wenden

 

Dat ick mijn leven magh volenden

 

In eenen heyligen goeden staet.

 

Wilt alle, etc.