Der fielen, rabauwen, oft der schalcken vocabulaer

[fol. B8v]

Vanden Zickissen.

DAt .xj. capittel is vanden zickissen, dat is vanden blinden. Item daer zijn drijerhande blinden inde wandelschap. Sommighe blinden worden genaemt Blocharten, ende dese blinden zijn van gods ghewelt blint gheworden, ende dese gaen bedeuaert. Ende als dese in een stadt comen soo verborgen si haren couelhoet oft caproen ende spreken tot die lieden dat si haer gestolen zijn, oft dat syse verloren hebben in die plaetse daer si gelegen hebben. Ende alsoo vergaderen sy .x. oft .xij. cappen oft couelen, ende dan vercoopen si die cappen.

Item sommige worden blinden genaemt, om dat sy geblint oft blint ghemaect zijn om misdaet oft boosheyt. Ende dese wandelen ghemeynlijck achter die landen, ende dragen gemaelde tafelen, ende sitten voor die kercken. Ende segghen dat sy te Roome, sinte Iacobs ende in andere vremde steden geweest hebben, ende vertellen groote teekenen die daer gheschiet zijn, ende het is altemael gheloghen.

Item sommighe andere worden blinden ghenaemt die met auontueren om gaen. Ende dese zijn die ghene die voor .x. iaren oft meer

[fol. C1r]

blint ghemaect oft blint geworden zijn. Dese blinden nemen boomwolle, ende maken die boomwolle bloedich, ende nemen dan eenen cleynen doec ende binden daer mede die boomwolle ouer die oogen, ende spreken dat si cooplieden oft cremers zijn. Ende dat si in een bosch oft walt van quade lieden blint gemaect zijn. Ende dat sy drye oft vier daghen aen eenen boom ghebonden ghestaen hebben, ende dat si verdoruen souden hebben, hadden daer geen andere menschen ghecomen die haer ghelost hadden. Ende dit heet metten bruch gewandelt. Conclusio. Mijnen raet is, dat ghy wel kennen sult, dien ghy gheuen wilt.