Der fielen, rabauwen, oft der schalcken vocabulaer

[fol. B7v]

Vanden Schlepperen.

DAt. x. capittel is vanden Schlepperen. Dese zijn die Kammesierers die haer wt gheuen voor priesters. Ende dese comen in die huysen gheghaen met eenen ionghen scholier die haer den sack nae draecht. Ende dese spreken aldus. Hier coemt een ghewijde persoon met namen, heer Ioris, oft heer wouter Kester van Kitsbubel, gelijck hy hem dan noemen wilt, ende ick ben wt alsulcken dorpe van dien geslachte, ende hy noemt een geslachte dat den lieden condich is. Ende ick wil op alsulcken dach mijn eerste Misse singhen in dat dorp. Ende ick ben gewijt op alsulcken outaer te bedienen, in dat dorp oft in der kercken, ende ick en hebbe geenen outaer doeck oft ooc gheenen misboeck, etcetera. Ende dit en can ick niet volbrenghen sonder hulpe van goede menschen. Ende alsoo menich mensche hem deelachtich maken wil van .xxx missen, die geue eenen offer. Ende alsoo menighen penninck hy daer toe geeft, alsoo menighe siele van zijnen gheslachte, sal wt den vegheuier verlost worden. Item si schuiuen oock somtijts die landsluyden mannen ende vrouwen in een broederschap. Ende spreken dat die broederschap toegelaten is van eenen bisschop met genade ende met aflaet, op dat

[fol. B8r]

sulcken outaer daer dore op comen soude. Ende dan worden die goede slechte menschen beroert, die eene gheeft gharen, die ander vlas, ende die derde een tafel laken oft een hantdweele, oft ghebroken siluer. Ende dese broderschap en is niet ghelijck die andere broederschappen die de questioniers oft casseneers hebben. Want die casseneers comen alle iaer wedere, ende dese en coemt niet meer dan eens, want quaem hy weder soo soude hy gestoffelt oft in eenen sack geschoten worden. Item dese neeringe wort seere gebruyct in sommighe landen ghelijck in swartzwalt, in bregetzer walt, in kurwalen, in algaw, in etslant ende in switzer landt, daer weynich priesteren zijn, ende daer die kercken ende huysen wijde oft verre van malcanderen staen. Conclusio. Desen schlepperen oft boeuen gheeft niet, want ten is niet wel aengheleyt. ¶ Exemplum. Eene hiet Mansuetus die liep ooc bidden op zijn eerste misse tot sinte Gallen. Ende op dien dach doen die goede menschen tot sinte Gallen op zijn eerste misse quamen, soo sochten sy hem in die kercke, maer si en vonden hem daer niet. Ende nae die maeltijt vonden si hem inden Sonnenbosch, dat is int bordeel. Ende hij ontliept hen allen.