Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Van die wederkeeringe der Keyserlijcker maiesteyt ten pallaeyse, ende van die grote costelicheyt dier gheschiede des auonts in die maeltijt.

IN sulcker manieren ende groter triumphen als die keyserlicke maiesteyt wt sijnen pallaeyse ghereden es, soe es hi weder met sulcker triumphen ende groten state weder om ghecommen des auonts als dye sonne begonste onder te gane Ende aldus ghecommen sijnde totten pallaeyse voorseyde, soe es hi van sijnen peerde gheseten, ende heeft alle die ghene die de insignen, prepamenten, bannieren, ende den hemele ghedreghen hadden, met noch menich andere stout ende frisch man, Rudders gheslaghen. Dit ghedaen sijnde so es hi met sijnen Baroenen ende edelen Princhen int pallaeys ghegaen, dat welcke was bouen ende beneden behangen met rijckelicken tapijtsen vander werckinghe der voorseyde stadt van Boulongien. Daer waren seer rijckelicke vergulde candelaers al omme ghehanghen, in die welcke waren ghesedt wel schoone ende oock wel rieckende keerssen, so dattet alsoo licht was of het dach gheweest hadde. In dese voorseyde sale was een seer rijckelijck tresoor ghestelt, dwelck was verchiert met wtnemende schoone sticken van inckelen sijnen goude ende seer costelijcken ghesteente van alle soorten, als van grote beckenen, platteelen, flesschen, potten, croesens, schalen, tregier layen, waterportten coppen, ende dit was seer wtnemende costelick ghewrocht. Ende int hoochste eynde vander voorseyder sale daer was ghedeckt eene tafele voor dye Keyserlijcke maiesteyt, ouer die welcke was eenen schonen hemel ghemaect van fijnen goude. Ende niet verre van daer soe wasser een andere ghedect voor den edelen Hertoghe van Sauoyen ende andere Princhen bouen ghenoemt, die die preparementen der crooninge

[fol. lviij.v]

ghedreghen hadden. Daer waren ooc andere salen behanghen ende verchiert met costelicke tresooren, voor die andere princhen, prelaten ende grote meesters. Ende als den tijt ghenaecte om te gaen eten, ende dat alle die tafelen seer costelic ghedect waren, die.K.M.ghinc sitten alleene aen sijne tafele in sijnen keyserlicken stoel, ende achteruolgende dandere princhen elc naer sijnder oordene ende qualiteyt, officie ende edelheyt, ghinghen sitten elc aen huere tafelen die voor huerlieden gheprepareert waren. Het watere wart deene voren ende dander nae ghebrocht om die handen te wasschene. Ende na die solempnele oracie dier ghedaen was, so was die benedictie vander tafelen ghedaen. daer naer die groote Hoofmeesters ende andere officiers daer toe gheordonneert houdende huere stocken in huere handen dienden ter tafelen, eerst het broot wt silueren manden, ende in silueren vergulden schotelen brochten si diueersche cleyne gherechten, dwelcke men noemt die eerste tafele, ofte het eerste gherechte, met sulcker excellencie alsomen wel bedencken mach ende dat toebehoort. Daer naer die tweede gherechten die waren ghebrocht in meerder platteelen, ende waren van die costelicste spijse diemen dinckken soude moghen, al in schoonder ordonnancie, elck met sijnder costelicker saussen ende veel meer dander wel behoefde ende van noode was. Daer nae voor het derde gherechte waren ghebrocht als voor het bancquet wter maten veel fantasien ende vreemde dinghen ghemaect van figuren ende personagien ghemaect vp gelleen, confiten ende dier gelijcke als sulc eenen banckette toebehoort, ten ware niet seer wel om scriuen die costelicheyt dier ghedaen was. Ende daer waren ooc die costelicste wijnen van alle soorten diemen soude moghen ouerdencken, ende daer waren die hoofmeesters ende schinckers dienende elck naer sijnder goeder ghelieften, ende van hi liefst dranc. Daer waren ook gheordonneerde prouuers aen alle tafelen, die van allen gherechten proufden ende die credencie deden. Dit aldus ghedaen sijnde so wasser een dinc dat alle den luyden verwonderde dat was, dat alle die gherechten dier ouer schoten tsamen metten platteelen, schotelen, ende schalen, waren alle tsamen ter veynsteren wt gheworpen vp die marct, ende elc mochte die rapen dier aen gheraken coste, ende van eenen yeghelijcken anderen gerechte so warender ghedect nyeuwe schoolakenen ende seruetten. Ende naer dat dit bancquet aldus met deser groter wtnemender costelicheyt aldus voleynt was, so brochtmen daer seer costelijcke welrieckende wateren om dye handen te dwane, naer der ghemeender costumen van sulcken bancketten, ende nae dat dye tafelen vp ghedaen waren so seydemen solempnelic die gracie, danckende god almachtich van sijnder ghebenedyder gracie. Daer na die.K.M.nemende dat keyserlijck sweert in sijn hant, slouch daer menich edel man ruddere. Ende nae dat den meesten deel vander nacht gheleden was, alle die princhen ende heeren quamen nemen orlof aen der.K.M.ende ghinghen elc ter ruste waert, elck in sijn pallaeys ende logijst, maer het volc vander voorseyde stadt van Boulongien continueerden huere triumphen met vieren ende ander batementen ende ghenouchten den gheheelen nacht duere, ende sommege daghen daer naer ten grooten costen, ende al ter eeren der keyserlicker maiesteyt, dat hem god gonne een lanck ende salich leuen Amen.

¶ Item ouermidts dese blijschap vander crooninge so ghincmen eerweerdeliken metter processien ende metten heleghen sacramente in alle dese landen, ende men vierde voor den noene, ende tsauonts vierdemen seer schone.

[Vpten.xxiij.sten dach van Maerte]

¶ Het Parlement te Mechelen wert den eersten steen gheleyt vpten.xxiij.sten dach van Maerte, welc parlement plach te ligghen te Parijs vanden lande van Vlaendren ende Henegouwe, want dese voorseyde landen niet meer te leen en dorsten ontfanghen worden vanden Coninck van Vranckerijck, want also ghesloten was int rantsoen vander verlossinghe vanden coninc van Vranckerijck.