Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Int iaer van.xxix.in Iunio]

Int iaer van.xxix.in Iunio, so was Mylanen ende dat stercke slot ghenoemt Arx Iouis beset van des Keysers volc,

ende die armeye vanden keyser lach te Ienuen. Aldus ghinghen die fransoysen te rade ende stelden haer ordonnancie om Mylanen in te nemen, met subtijlheyt, ende ordonneerden wel.L.vaenkens inder manieren van des keysers volc, ende quamen so voor Milanen. Ende die van Mylanen siende die bannieren, niet anders wetende dan dattet was des keysers volc en schoten niet eenen schoot maer lietense in commen sonder slach oft

[fol. xlij.v]

stoot. Als die fransoysen binnen waren riepen si al. Viue le roy de franche, ende met dien vielen si vp die spaengiaerden dye die stadt bewaerden ende sloeghen die al doot, ende hebben so met subtijlheyt die stadt in ghenomen, doende grote foortse ende moort. Ende als die fransoysen aldus binnen Mylanen waren, so meenden si dat slot Arx Iouis ooc te crijghen sonder wederstoot. So ghinc die graue van saintpol ende dye graue van Vendome ende hielden sprake metten casteleyn, ende si eyschten dat slot vp te gheuen inden handen vanden coninc van Vranckerijc. Neen seyde die Casteleyn ic en sal gheen verrader sijn om den coninc van Vranckerijc, noch om uwer lieden wille, noch om v ghiften oft gauen. Ic sal den Keyser ghetrou blijuen tot in mijn doot, ghi en sult hier hiet halen dan slaghen. Dit horende die fransoysen waren seer ghestoort ende seyden, dat sal noch ghewroken werden. doen seyde die Casteleyn comt als ghi wilt, ick noode v te gaste, ic sal vp u koken. Ende die casteleyn heeft terstont brieuen gheschict aen den Prinche van Araengien ende aen Andries dory sijnen broeder, ende aen graue Ioris van Zassen, hem lieden te kennen gheuende dese grote subtijlheyt der fransoysen. Waer vp des Keysers capiteynen niet en hebben gheslapen, maer brochten terstont al haer macht voor Mylanen. Dye capiteyn van Ienuen ende graue Ioris van Zassen met haren volcke sijn stoutelic aen die mueren gheuallen Ende die Capiteyn vanden slote dit siende dat hem ontset commen was, liet dye brugghe vanden casteele neder, ende quam soe metten knechten in die fransoysen slaen, so dat die fransoysen niet en wisten waer bliuen, ende die van den slote vochten so seere vp die fransoysen, dat des keysers volc ooc binnen quam hem te hulpen, so dat dye meesten deel der fransoysen bleuen daer doot metten graue van simpol ende den graue van Vendomme met veel edelen. Ende dit es al ghedaen vanden coninc van Vranckerijc, als hi noch al was gheuanghen man.