[Vpten Sinxen dach]
[Int iaer van xvc.ende xxviij.maeckten die Gheldersche een vergaderinghe tot Romunde]
Int iaer van xvc.ende xxviij.maeckten die Gheldersche een vergaderinghe tot Romunde so van knechten, burgheren huyt Remunde ende Venloe, ende ooc met een deel huyslieden van sommeghen dorpen daer bi gheleghen, tot vijf vaenkens toe soe men seyde, daer hooftman af was ioncker Henrick van Wissche. Ende sijn so ghetoghen vpten Sinxen dach in die Meyerie vanden Bossche om dat landt te verheeren ende te brantschatten, Hese, Leen ende die dorpen daer ontrent, ende so te commen tot Ghele vp den ommegancx dach, om so te ghecrijghene die casse van sint Digne, maer faelden heel van huerder meyninghe ende voornemen..In desen middelen tijden was ioncker Dieric van Batenborch stadthoudere vanden Graue van Bueren ten Bossche die dit int heymelijck vernomen heeft, ende es met ruyters ende knechten daerwaerts ghetoghen, ende heeft alle die huyslieden vp dye beenen ghehadt, ende es so inden Ghelderschen hoop gheslaghen die meest doot bleuen ende gheuanghen, so datter niet veel weder thuys en quam, dat iammer was, want dye daer ontliepen waren veruolcht tot aen der masen, daer van hem lieden veel verdroncken. Ende dye onse namen al dat dye Ghelderschen met hem hadden ghebracht, te wetene veertich haechbussen, veel leeren, veel hout horden om ouer die grachten te loopene, veel menckysers, veel duymysers, ende veel coorden om die schamele huyslieden daer mede te bindene ende gheuanghen te leyden, maer waren selue daer mede met dye ghereetschappe die si mede gebrocht hadden ghebonden, ende so in vanghenissen ghesloten ende rentsoene ghestelt. Op welcken dach sy wel dencken mueghen. Oock hadden si met hem lieden ghebracht veel victaelien, meenende daer wat te vercoeuene, maer dye fortune sloech anders. Als dese tijdinghe binnen Remunde quam was daer seer groten druck bedreuen vanden vrouwen die haer mans verloren hadden, ende vanden kinderen die haer vaders verloren hadden seer deerlijck, dat iammer was om sien ende om horen, maer si ontfinghen loon naer huer wercken die si voren hadden.
¶ Inden seluen tijt dat ons volc van voor Thiel vp ghebroken was, so quam heer Ioris Schinck int Graefschap van Zutphen in die Oostmaent, daer hi eenen groten roof haelde, daer sommege Gheldersche door bleuen die dat wilden keeren ende beletten. Ende die knechten die binnen Thiel waren hadden tot Hattem beleydt gheweest die gheloeft hadden bi eede, dat si binnen een maent teghen die Keyserlicke maiesteyt niet doen en souden. Ende die selue knechten quamen doen bi Megen, daer si een blochuys ende dye stadt van Megen in namen die wijle dat dye knechten van Megen huyt waren ende gheleyden sommeghe wijn waghens, ende die Ghelderschen maeckten haren aenslach te commen tot Os ende Nyeulant, maer die van shertoghen Bossche sonden daerwaerts ter stont hondert peerden, ende dye Ruyters vanden Graue quamen oock bi. Dit vernemende die Ghelderschen verlieten Megen, ende trocken metten gheuanghenen ende roof nae huys.
Auteursrechtvrij