Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Vpten.ix.sten dach van Maerte]

Vpten.ix.sten dach van Maerte, int iaer ons heren.xvc.ende.xxviij.dwelc was vp eenen maendach, so gebuerdet datter een tenghieter Tantwerpen aen die kercke van sinte Michiels clooster wat souderen soude aen een clocxken dat inden cleynen torre eerst ghehanghen was Ende terwijlen dat den meester beneden gheloopen was yet halen, was den wint int vier gheslaghen ende gheiaecht in dat dack, midts den seer groten wint diet waeyde, so dat die kercke begonste te bernen naer noene ten.iij.hueren. Ende eer die clocke van.vij.hueren tsauonts, was alle dat dack metter capellen ende pant af, maer het vier conste in die kercke niet ghecommen noch schade doen midts dat het ghewelfsel vander kercken ende pande so sterck ende so dicke was. Ende ontrent den.vij hueren begonste den grooten torre vanden seluen clooster te bernen ende die clocken vielen ende bernde van binnen tot aen dat huerewerc, ende daer

[fol. xxxviij.v]

en conste dat vier niet gheuesten om dattet soe hooghe was, ende om dat den wint so sterck was. Dit bernde tot snachts na den xij.hueren, soe dat alle die huysen daer ontrent staende, daer den wint waeyde, in groter vreesen waren. Ende dese schade was weder vp ghemaect al voor kerstmisse daer naer, dwelck groot goet coste.

¶ In Iunio wast bestandt huyt ghelesen, tusschen den Coninck van Vranckerijcke ende onse landen aen dese sijde vander zee, maer het duerde nyet lange. Doen wert corts daer nae weder een ghebot ghedaen nyemant te moghen roouene vp die laghe, ende dit bestant gheduerde.viij.maenden lanck.