Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Van die crooninghe van Fernandus in Vngheren, ende eerst sijn incomste in dye stadt Stoelwittenburch. Int iaer.M.vc.den lesten dach Octobris.

[fol. xxxiiij.r]

DIe edel Prinche Ferdinandus hadde te wijue des conincx dochter van Behem, ende was die suster vanden coninc van Vngaren. Waer om als dye coninc van Behem door was, so wert daer in sijn stede ghecoren ende ghecroont die seer edele prinche Eertshertoghe van Oostenrijcke Ferdinandus met groter eeren, solemniteyten ende ceremonien dat toe behorende, in die stadt van Prage. Int iaer.xxvij.soot voorseyde es. Ende dit es die derde reyse dattet Conincrijc van Behem es verstoruen opt huys van Oostenrijc. Ende int selue iaer wert hy ooc ghecroont.Coninc.van Vngaren inder manieren hier na volgende

[Den tweeden dach in Nouembre]

¶ Inden eersten sijn inghecommen Hongeren ende Huseren wel toe ghemaect tsamen.vi^c.elc een schoon peert ter sijden leydende, daer na quam graue Iulius van Hardec, ende Dieric spaet met meer edel mannen, met.M.mannen te peerde int harnasch. Doen quam van Rechenberch met.xx.peerden vp dye Tartarsche maniere, ende.L.Huseren met haer targien lanskens ende vaenkens. Daer nae Molzan die velt Maerscalc met.L.mannen te peerde Daer naer heer Ioris van Awrsperch, ende ander edelmannen huyter Stiermarck met hondert ende.xxx.peerde volcx wel ghewapent. Die hoofman van tpeerde volc huyt Oostenrijck van Lichtensteyn met.C.ende.L.peerden ghewapent Des conincx hofmeester met sommeghe vanden huysgesin met.C.peerden Die graue van Salm, ende ander edelen met.C.ende.L.peerden, ende.L.ghebardeerde peerden int volle harnasch. Dye capiteyn vanden Artchiers met.L.peerden. Doen quamen.xl.van des Conincx pagien vpt Turcx ende ander schoon peerden. Dye graue van Mansuelt, die Lantgraue van Lichtenberch, ende die graue van Hennenberch met sommeghe Spaengiaerts vanden huysgesin in sijden ende fluweel ghecleet, met ander heren int harnasch met xc.ghebardeerde peerden ende den standaert Heer Andries ongenaed met.xx.peerden Doe des conincx trompetters ende ketel trommelers, doe der conincliker maiesteyt raet ende Cancelliers, Rentmeesters, ende sommeghe ander heren int sijden ende fluweel, graue Ny-

[fol. xxxiiij.v]

claes van Salm die ionge, die hofmeesters vanden.coninc.ende coninginne Doe volchden die vngersche bisscoppen met groten staet, doe een Vngers graue, daer na die grote.G.van Vngheren, ende die Mercgraue van Brandenborch. Daer na quam die.coninc.selue in een gulden stuc onder eenen gulden hemele, ende die wert ghedragen vanden vngerschen priesteren, ende ter rechter sijden vanden.coninc.vrou Marie die oude coninginne sijn suster, ende ter slincker sijden vrou Anna zijn huysvrou. Doe volchden dye coninginnen, ioncfrouwen, doe doude ioncfrouwen vp hangende wagens, doe der ouder coninghinnen huysgesin al gecleet int swerte, doe een hongers here met.ij^c.ende.L.peerden, heer Ian van Hilchen met.lxxx.peerden. Ooc quamen in stoelwittenberch opten eersten dach van Nouembre veel Vngersche ende huseren, ende die bisschop van Gran met.ij^c.ende.L.peerden. Ende den tweeden dach in Nouembre quam in Peeter Weyda van Seuenborghen, die eerlijc in ghehaelt was, noch ooc ander peerde volc seer veel, ende noch.vi^m.voetknechten vanden coninc hadden die vaerden den eersten dach ende nacht

[Opten derden dach in Nouembre]

¶ Opten derden dach in Nouembre, ende was een sondach, es.Coninc.Ferdinandus met zijn huysvrou ende met zijn suster in onser vrouwen kerk te Stoelwittenburch bracht met bisscoppen vorsten, heren huyt duytslant ende hongeryen, met Italiaensche ende Hongersche trompetten ende keteltrommelen. Ende die grote graue van Vngaren heeft voor hem gedragen die croone van Vngaren. Primi Petri weyda van Seuenborch den sceptre, heer Alexius dorsij den appel, ende graue Wolfposing dat sweert. Ende so wert hi gebracht in onser vrouwen kercke inden choor, daer voor hem ghebracht worden.v.rijckelicke bannieren, die een was metter.coninclijcker.M.wapenen ende colueren, die ander.iiij.waren vanden conincrijcken van Vngaren, Bemen, Dalmacien, ende Croacien. Ende die coninclijcker.M.wert ghestelt in eenen costelicken stoel, ende doe es hi vp ghestaen ende ghegaen voorden outaer, ende daer knielde hi, ende die bisscop van Neytra las hem veel dinghen voor huyt een boec, daer dye coninc doe sijn vingheren vp den boek leyde ende beswoer dat. Dat ghedaen sijnde salfde die bisschop van Neytra sijnen rechter arm metter heyliger olyen tusschen den elleboge ende die hant ende tusschen sijnen rugghe. Ende hi was weder in sijnen stoel gheleyt ende die misse wert doen ghedaen, ende als dye Epistele ghesongen was so wert hy weder ghebracht voorden outaer, daer hi knielde. Doe vraechde die grote graue van vngaren drie mael den Vngerschen, oft si wilden Ferdinandum hebben tot eenen.coninc.Doe riepen si al ghemeenlic. Iae wi, iae wi. Doe sloegen dye ketel trommelijns, ende die trompetters bliesen die trompetten ende maecten vruecht. Ende die bisschop van Neytra nam de croone vanden outare, daer veel Vngersche heren dye hant aen hielden, ende heeft den.coninc.daer mede ghecroont ende doen gauen si den.coninc.den appel ende dat sceptre in sijn hant, ende gorden hem met dat sweert dat hi voor den outaer huyt trac, ende stac dat doe weder om vp. Ende na die misse ende als die ceremonien ghedaen waren so es die.coninclijcker.M.huyter kercken ghegaen, ende es vp een peert gheseten, ende es ghereden buten tot een cleen kercxken, daer hi tusschen wegen veel ghelts, honghers rijnsch gouts, ende croonen dede huytwerpen ende ander siluer ghelt van.xij.penningen vi.penningen ende batsen. Aen welc kercxken was een stellagie seer costelijc bereyt, daer vp die coninc der gemeenten weder eenen eedt moeste sweeren, vp datghene dat hem die bisschop van Vesperijn als cancellier des rijcx voor ghelesen hadde, daer die gemeente den coninc.gewinst heeft door gods gracie victorie geluckich ende goet regeren Ende doe es die.coninc.weder int stadt gereden, ende sittende vp zijn peert track hy huyt sijn sweert bloot, ende dede eenen streec tegen turckyen, ende noch.iij.streken tegen.iij.ander deelen der werelt, ende es doe in sijn hof ghereden, daer hi metten heren grote chiere maecte. Ende opten.iiij.dach nouembris wert Anna sijn huysvrou ooc in dier gelijcker manieren coninginne gecroont, sonder dat si met dat coninclijck habijt, noch metten sweerde nyet te doen en hadde. Ende nader missen es si weder te houe gecommen, daer al die heren goet chiere maecten.