[Int iaer.xvc.xxvi.int beghintsel vanden iare]
Int iaer.xvc.xxvi.int beghintsel vanden iare, so starf Ysabeele des keysers sustere, des conincx van Dennemarcken wijf, die langhe sieck ghelegen hadde, ende starf te Eertvelt, ende wart te Ghendt begrauen, ende liet achtere eenen sone ende twee dochteren.
¶ In desen selue maent quam die tijdinge dat het tractaet ghemaeckt was tusschen den keyser ende den coninc van Vranckerijc, ende dat den coninck van Vranckerijcke verlost soude worden vp condicie dat hi soude ouergheuen ende versaken trecht dat hi hadde aen Mylanen, aen Napels, aen Bourgoengien ende Doornicke, ende noch ander heerlicheden, ende dat hi soude reysen in sijn landt, ende seynden sijn kinderen in ostaedgie, totter tijt toe, dat dese beloften volbracht waren. Ende die Keyser soude hem te huwelijc gheuen Helenoram sijn sustere, die doen wedewe was vanden coninc van Poortegale Dwelc qualic ghehouden wart, want die Paeus metten Venetianen ende Lombaerden metten Geneuoysers meynden wel in die maent van Iunius die stadt van Mylanen in ghenomen te hebbene, maer Borbon ende die Spaengiaerden wierdens gheware ende sloughender vele deet, ende die hertoghe van Mylanen wiert gheuanghen, so dat die orloghe in Italien van daghe te daghe wies, wantter met alle veel Spaengiaerden ouer quamen. Ende wt duytslant quam hertoghe Iorijs met vele duytschen ter hulpen van Borbon, so dat daer dicwils gheschalmust wiert, maer des keysers volck behielt altoos die ouerhant, ende wonnen steden ende sloten.
Auteursrechtvrij