Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Van dat belegghe van Rodes, ende hoe dye Turcsche Keyser raet hielt met sijnen heren, om dye stadt te becrachtighen.

Ende screef eerst brieuen totten grootmeester van Rodes, inhoudende dit naeruolgende, ende dit was int iaer M.CCCCC.ende.xxij.

¶ Dat.iij.capittel.

[fol. x.v]

SOlymannus Staccus byder gracien gods een coninc der coninghen, een heere der heren, die meeste Keyser van Byzancien, die alder machtichste coninck van Persen, Arabien, Syrien, ende Egypten. Heere van Asien ende Europen. Prinche van Mecha, van Alexen, van Iherusalem, een domineerder ende besitter des gheheelen meyrs ende zeen etc. den grootmeester van Rodes saluyt.

Ick verblijde mi in die comste van uwe nyeuwen dominie ende heerschappye, dwelc ic begheere dat ghi langhen tijt met ghelucke moet besitten. Ic hope ooc seer dat ghi te bouen sult gaen in duechden ende ghetrouwighen ghelooue al die naer v sullen commen regeren ende ghebieden in dat Eylant van Rodes, vanden welcken mijn voorvaders haer macht te thoonen hebben hem onthouden, door welcker exempel ick oock met v houde vrientschap ende gracie. Daer om mijn vrient verblijt met mi vander triumphe ende victorien doen ic trac ouer die Danubie, daer stoutelic verbeydende den Coninck van Vngarien inden strijt daer ic vele steden wan, ende quelde dat volc metten sweerde ende barnen, ende bracht veel volcx onder mijn subiectie ende dienst, ende liet daer mijn heyr, ende keerde weder als victorieus in mijn stadt van Constantinopel. Vale.