Dits die Excellente Chronijcke van Vlaenderen
(1531)–Anoniem Dits die excellente cronike van Vlaenderen–Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]
¶ Dat.ij.Capittel.![]() ALs die Edele Prinche Kaerle nv al sijn landen besworen hadde, ende sijn grootvadere die duechdelike Keyser Maximiliaen van tmomboorschap ontslaghen was, so nam hi oorlof aen sinen sone Karolo, den ionghen Prinche, ende aen alle die Heeren, ende hi is wech ghereyst nae duytsch landt, ende hi heeft alle sijn dinghen met vreden gheordineert, ende na sijn beste wel doen bestellen. Ende quam daer nae in dye stadt van Velsz, daer hi siec wert ende die sieckte beswaerde hem ten lesten so seer dat hi te bedde bleef legghen. Ende sijn medecijn meester, ende noch ander meesters quamen hem besoecken, besiende sijn vrijne spraken van crancken troost om te ghenesen. Dus maecte die duechdelijcke Prince sijn Testament in die stadt van Velsz, in welcke testament hi beual datmen sijn lichaem niet exemtereren noch balsamen en soude, maer men soude vinden een eycken kiste daermen sijn dode lichaem in soude leggen. In welcker kisten men ooc alle dinc vinden sal, dat totten doden lichaem sal behoren, te weten, eenen grouen swellich daerment tlichaem in nayen soude voort soudemen sijn oghen, ooren ende sijn mont | |
[Folio viij.r]
| |
vullen met ongheblusten calc, ende so sijnen lichaem legghen in dye eycken kiste ende ter eerden doen, welcke eycken kiste hy wel.iij.iaren met hem vuerde waer dat hy reyse, want si was ghesloten in een yseren kiste, daer Maximiliaen alleen die sluetel af behielt. Ende waer hi quam terstont moesten sijn aertchiers dye kiste op sijn camer brengen daer hy sliep, so dat elc meende dat daer in costelijc dinghen ende iuweelen gheweest waren. Ende als hy so sieck wert dat hem dochte die doot te ghenaken, so ontfinc hi dat heylighe sacrament, ende hi stelde sijn herte onder den stercken standaert des gheloofs met betrouwen der heyliger ende voldoender passien, ende der alder bitterster doot christi Ihesum, beuelende sijn siele in die handen des hemelschen vaders, ende gaf sijnen gheest. Ende sijn lichaem wert gheleyt in die eycken kiste, die wert ghesloten in die yseren kiste, ende werdt so ghebracht ter Nyeuwer stadt, daer hi wert so begrauen bi sijnder moeder Leonora. Hy stierf int iaer ons heren.M.CCCC.xix.den.xij.dach Ianuarij in sijn.lix.iaer, als hi driendertich iaer Roomsch Coninck gheweest was.
¶ In die maent van Februarius, int Iaer xvc.xix.doe cochte die Coninck van Vranckerijcke, die stadt van Doornicke teghen den coninck van Inghelandt, ende die fransoysen quamen met garnisoene in die stadt.
¶ In dese selue maent doen trauwe Hertoghe Karel van Gheldre dye dochtere van Lunenburch.
¶ Item in desen tijt so was het cooren seer goet coop, want men cochte den rogghe om ix.℔, ende die terwe om.xij.℔. |
|